Летот MH370 мистериозно исчезна во 2014 година на пат од Куала Лумпур до Пекинг, што ја покрена една од најголемите потраги во историјата на воздухопловството. Бидејќи авионот и патниците никогаш не се пронајдени, тие се прогласени за законски мртви. Повеќето од патниците беа кинески државјани, а нивните семејства сè уште бараат одговори
Суд во Пекинг ѝ наложи на авиокомпанијата „Малезија ерлајнс“ да им исплати отштета на семејствата на осуммина патници на исчезнатиот лет MH370. Секое семејство има право на 2,9 милиони јуани, или околу 352 600 евра, а отштетата ги покрива смртта на најблиските, трошоците за погреб и отштета за ментална болка, соопшти судот, пренесува „Скај њуз“.
Летот MH370 мистериозно исчезна во 2014 година на пат од Куала Лумпур до Пекинг, што ја покрена една од најголемите потраги во историјата на воздухопловството. Бидејќи авионот и патниците никогаш не се пронајдени, тие се прогласени за законски мртви. Повеќето од патниците беа кинески државјани, а нивните семејства сè уште бараат одговори.
Судот, исто така, објави дека 23 други случаи се во тек, додека 47 други постигнале спогодби и ги отфрлиле обвиненијата. Минатата недела, малезиската влада објави дека потрагата по авионот ќе продолжи на 30 декември.
Последната комуникација од авионот е снимена приближно 40 минути по полетувањето, додека летал над виетнамскиот воздушен простор. Капетанот Захарие Ахмад Шах го завршил преносот велејќи:
„Добра ноќ, малезиски три седум нула“.
Кратко потоа, транспондерот на авионот престанал да работи, а контролата на воздушниот сообраќај го изгубила контактот.
Податоците од радарот покажале дека авионот нагло се свртел лево, летајќи над Малајскиот Полуостров. Истражителите веруваат дека се урнал во Индискиот Океан, западно од Австралија. Неколку мали парчиња остатоци за кои се верува дека се од исчезнатиот авион, кој превезувал 227 патници и 12 членови на екипажот, оттогаш се пронајдени на плажите.
Поранешниот австралиски премиер Тони Абот тврдеше во 2020 година дека од самиот почеток највисоките нивоа на малезиската влада верувале дека капетанот Шах намерно го соборил авионот. Сепак, без да ги пронајдат остатоците и црните кутии, истражителите не можат со сигурност да утврдат што точно се случило.