Во понеделникот, Стејт департментот ги повика Американците низ целиот Блиски Исток, од Египет кон исток, да го напуштат регионот преку комерцијални рути, иако аеродромите се затворени или работат под строги ограничувања во поголемиот дел од регионот
САД објавија дека приближно 9 000 нивни граѓани го напуштиле Блискиот Исток поради војната со Иран и ризикот од одмазда.
„Во текот на изминатите неколку дена, повеќе од 9 000 американски граѓани безбедно се вратија од Блискиот Исток, вклучувајќи повеќе од 300 од Израел. Организирани се чартер летови за превоз на патници од Обединетите Арапски Емирати, Саудиска Арабија и Јордан“,
се вели во соопштението на Стејт департментот.
Во понеделникот, Стејт департментот ги повика Американците низ целиот Блиски Исток, од Египет кон исток, да го напуштат регионот преку комерцијални рути, иако аеродромите се затворени или работат под строги ограничувања во поголемиот дел од регионот.
Опциите за комерцијално патување со авион остануваат достапни во Саудиска Арабија, Обединетите Арапски Емирати, Оман и Египет, соопшти Стејт департментот.
Американскиот државен секретар Марко Рубио синоќа изјави дека Стејт департментот активно работи на помагање на Американците кои сакаат да го напуштат Блискиот Исток.
„Идентификувавме и продолжуваме да идентификуваме чартер летови, опции за воени летови и проширени опции за комерцијални летови, што значи дека работиме со авиокомпаниите за испраќање поголеми авиони со повеќе седишта“,
изјави Рубио пред новинарите, пренесе Си-ен-ен.
Според него, во неколку случаи, авионите биле на пат кон регионот пред да се затвори воздушниот простор и морале да се вратат назад.
Рубио рече дека повеќе од 1 500 Американци побарале помош од Стејт департментот за да го напуштат Блискиот Исток.
„Знаеме дека ќе можеме да им помогнеме. Ќе биде потребно извесно време, бидејќи ние не го контролираме воздушниот простор“,
рече тој.
Соединетите Американски Држави затворија неколку свои амбасади во регионот и веќе евакуираа несуштински персонал и нивните семејства по иранските ракетни и беспилотни летала. Владите и авиокомпаниите организираат летови за репатријација на патниците заглавени од војната на Блискиот Исток. 19 000 летови се откажани за четири дена, а комерцијалните летови се обновени денеска во ограничен број.