Според УНХЦР, 406 611 Украинци влегле во Молдавија, мала земја со 2,6 милиони жители која е меѓу најсиромашните во Европа, но и најблиску до украинското пристаниште Одеса
Повеќе од 4,4 милиони украински бегалци ја напуштија својата земја откако рускиот претседател Владимир Путин нареди инвазија на 24 февруари, според податоците на Агенцијата за бегалци на ОН. УНХЦР соопшти дека до денеска има 4.441.663 украински бегалци. Тоа е за 59.347 повеќе од претходниот ден.
Европа нема видено ваков бран бегалци од Втората светска војна.
Деведесет отсто од оние што избегале од Украина се жени и деца, бидејќи украинските власти не дозволуваат да си заминат мажи на воена возраст.
Според Меѓународната организација за миграција на ОН (ИОМ), околу 210.000 не-Украинци, исто така, ја напуштиле земјата. Обединетите нации проценуваат дека 7,1 милион луѓе се раселени во земјата, според бројките објавени од ИОМ на 5 април.
Пред конфликтот, Украина беше дом на повеќе од 37 милиони луѓе на територијата контролирана од Киев – која не го вклучува Крим, анектиран од Русија во 2014 година, или областите на исток под контрола на проруските сепаратисти.
Полска е домаќин на убедливо најголем број бегалци. Од 24 февруари, 2 564 994 влегле во Полска, според УНХЦР. Многу од нив потоа патуваат во други европски земји.
Од оние кои остануваат во Полска, на 700 000 веќе им е доделен национален матичен број, соопшти УНХЦР. Полската гранична полиција проценува дека повеќе од 500 000 луѓе се вратиле во Украина по конфликтот. Полска пред војната имаше околу 1,5 милиони украински имигрантски работници.
Според агенцијата за бегалци на ОН, 678 081 луѓе отпатувале во Романија до 8 април, од кои повеќето пристигнале преку Молдавија, а потоа продолжиле во други земји.
Според УНХЦР, 406 611 Украинци влегле во Молдавија, мала земја со 2,6 милиони жители која е меѓу најсиромашните во Европа, но и најблиску до украинското пристаниште Одеса.
Според УНХЦР, од 8 април, Унгарија примила 413 888 Украинци. Бројот на бегалци во Русија заклучно со 8 април изнесува 389 845.
Помеѓу 21 и 23 февруари, 113 000 луѓе преминаа во Русија од сепаратистичките региони Донецк и Луганск во источна Украина. До 7 април, Белорусија прими 19 096 луѓе од Украина.