Двата пациенти суспектни на мајмунски сипаници денеска од Клиниката за кожни болести биле упатени во Инситутот за јавно здравје, каде што по направените лабораториски испитувања на три различни начини е потврдено дека се носители на болеста
Институтот за јавно здравје (ИЈЗ) информира дека во земјава се потврдени првите два случаи на мајмунски сипаници.
Двата пациенти суспектни на мајмунски сипаници денеска од Клиниката за кожни болести биле упатени во Инситутот за јавно здравје, каде што по направените лабораториски испитувања на три различни начини е потврдено дека се носители на болеста.
„Согласно протоколите, по добиеното известување, докторот кој ги примил пациентите ги информира пациентите за добиените резултати. Потоа следи епидемиолошка анкета од страна на епидемиолози од ИЈЗ. Стручни лица епидемиолози од ИЈЗ се вратени на работа и пристапија кон епидемиолошко анкетирање на двете лица, како би се добиле податоци кои би биле исклучително важни за понатамошно постапување. Анкетата е се уште во тек. Ќе биде препорачано на позитивните пациенти да се јават на Инфективна клиника“,
информираат од ИЈЗ.
Со оглед на тоа што ова се први лабораториски потврдени случаи на мајмунски сипаници во земјава, ИЈЗ апелира на смиреност бидејќи, како што велат оттаму, брзо и навремено институционално се преземаат потребните мерки.
„По добиените резултати, веднаш се реагираше брзо, се преземаа соодветни мерки и се известија надлежните институции – Министерство за здравство, Клиниката за кожни болести, Инфективна клиника и др. Вечерва се мобилизирани сите институционални капацитети за надминување на последиците од ваквата појава и се преземаат сите превентивни мерки. Институтот за јавно здравје ќе продолжи да ја следи состојбата“,
велат од ИЈЗ.
Од Инситутот најавуваат подетални информации во текот на утрешниот ден.