Според компанијата „Јунајтед груп“, снимката од разговорот е нецелосна и контекстот не е тој што е прикажан во медиумите – негираат дека српските власти се мешаат во раководството
„Јунајтед груп“, под чие раководство е телевизијата Н1, го потврди разговорот на нејзиниот генерален директор Стен Милер со генералниот директор на „Телеком Србија“, Владимир Лучиќ, по вчерашната аудиоснимка објавена од Н1 и КРИК.
- (ВИДЕО) Објавена аудиоснимка за напорите да се ослабне Н1
- ОЦЦРП: Притисоци за промени во раководството на Н1 од страна на српските власти
Според компанијата, се работи за деловна комуникација.
„Претходно „Јунајтед груп“ продаде неколку различни средства на ‘Телеком Србија’. По таа зделка, рутински и неопходно е да има комуникација помеѓу двете компании“,
се вели во соопштението на „Јунајтед груп“, објавено од Н1.
Оттаму велат дека снимката не е целосна и контекстот не е тој што е прикажан во медиумите, така што во ниту еден момент „Телеком Србија“ или некој друг не вршел притисок за да се отпушти од работа Александра Суботиќ, која е трн во око на српските власти поради нејзината независност.
„Јунајтед груп“ не потпаѓа под политички влијанија од кој било тип. Александра Суботиќ не е вработена како член на уредништвото во ниту една медиумска организација на ‘Јунајтед груп’. Наводите во медиумите дека госпоѓа Суботиќ е дел од уредништвото се неточни. Таа работи во менаџерскиот тим на „Јунајтед груп“ и останува на својата позиција. Господин Милер, самиот во снимката вели дека нема да ја отпушти“,
се вели во соопштението.
Компанијата нагласува дека е цврсто посветена на одржување доследни и јасни граници помеѓу раководството и уредништвото и дека неодамна ангажирале двајца меѓународни експерти за да спроведат ревизија во информативните редакции, со цел да се осигура независноста на новинарите.
Директорот на „Телеком Србија“, Владимир Лучиќ, вчера, веднаш откако беше објавена снимката од телефонскиот разговор, ги отфрли сите шпекулации дека во име на српската влада се меша во раководењето на Н1. Притоа и тој рече дека се работи за деловен разговор.
„Новиот директор на ‘Јунајтед груп’, Стен Милер, го познавам речиси два месеца и не се тајни разговорите како партнери кои учествуваа во зделката при која ‘Телеком Србија’ купи дел од ‘Јунајтед груп’“,
рече Лучиќ.
Според Лучиќ, деловната пракса и правните норми ги обврзуваат претставниците на компаниите да имаат постојана комуникација која треба да обезбеди ефикасна транзиција на сите деловни функции.
„Во разговорот со господинот Милер не стана збор за медиумите кои се во сопствеништво на „Јунајтед груп“ ниту некој се осудил да влијае на уредувачката политика“,
рече директорот на „Телеком Србија“.
Сепак, тој најави кривични пријави за медиумите кои го објавиле разговорот бидејќи смета дека му е нарушен угледот.