Министерот за економија Крешник Бектеши на прес-конференција информираше дека склучени се договорите за изградба на фотонапонски централи на приватно земјиште. Од 44 понуди кои стигнале на повикот објавен лани, избрани биле 23 инвеститори за изградба на фотоволтаици со вкупна инсталирана моќност од 21 мегават.
„На почетокот на август минатата година беше објавен јавниот повик за доделување премии за електрична енергија произведена од фотонапонски централи на приватно земјиште. Тендерската постапка за доделување на премии се спроведе како отворена постапка, најтранспарентно, при што беа доставени 44 понуди, и по комплетно спроведената евалуација, и роковите за жалби, се утврди дека од понудените 27 MW, потпишани се договори за право на користење на премија за вкупно 21 MW, согласно доставените понуди за 29 локации низ целата држава со вкупно 23 инвеститори во 16 општини. Јавниот повик беше поделен во четири дела во зависност од површината на земјиштето“,
изјави Бектеши.
Министерот додаде дека на годишно ниво за сите договори, и за државното земјиште и за приватното земјиште ќе се исплаќа околу 420 илјади евра, во зависност од производството на електрична енергија .
„На тендерот за државно земјиште поради големиот интерес наместо државата да исплаќа премии добивме приближно три милиони евра од компаниите кои ги потпишаа договорите. Тоа значи дека со парите од државното земјиште ќе се покријат трошоците за 7 наредни години за премиите и на приватното земјиште и на државното земјиште“,
изјави Бектеши.