„Со новата флота од пет локомотиви и постојните четири понови, ќе располагаме со девет модерни локомотиви кои ќе можат целосно да го покријат карго-превозот, а дел од нив да се користат и во патничкиот сообраќај“, вели вицепремиерот и министер за транспорт, Николоски
Договор за заем меѓу Македонски железници Транспорт и Европската банка за обнова и развој (ЕБОР) во износ од 20,9 милиони евра е потпишан денеска во Владата. Овој заем е наменет за набавка на нови електрични локомотиви со резервни делови. Целта на оваа инвестиција е поголем транспорт на стоки и генерирање приходи на претпријатието.
Ова е важен чекор кон модернизација на МЖ Транспорт, како и кон унапредување на сигурноста и ефикасноста на товарниот железнички сообраќај.
Условите по кои се обезбедени средствата, како долгорочен рок на отплата, поволен грејс период и конкуретна каматна стапка, се во целосна согласно со стратегијата за одговорно управвање со јавниот долг и обезбедување одржливи јавни финансии.
На потпишувањето, покрај претставници од ЕБОР, присустувваа и претставници на Министерството за транспорт и на раководството на Железници на РСМ Транспорт.
Премиерот Христијан Мицкоски рече дека пред потпишувањето на договорот се правела анализа за потребите, функционалноста и оперативноста на МЖ Транспорт.
„Железницата со години е занемарувана, а е од суштинско значење за економијата, извозот и европската иднина на Македонија. Состојбата што ја наследивме е катастрофална. До неодамна МЖ Транспорт немаше ниту една целосно функционална локомотива. Затоа, сега правиме системска обнова на железничкиот сектор“,
кажа тој.
Вицепремиерот и министер за транспорт Александар Николоски вели дека со овој договор се заокружува важен процес кој ќе значи набавка за најмалку пет нови електрични локомотиви, заедно со пропратни резервни делови.
„Минатата година имавме нула оперативни локомотиви, со што железничкиот сообраќај беше парализиран, а бројни композиции стоеја на амкедонските пруги, бидеји немаше со што да се оперира. Потоа ставивме во функција пет локомотиви, а денес веќе имаме над 11 функционални локомотиви, од кои четири се понови, а седум се постари. Со новата флота од пет локомотиви и постојните четири понови, ќе располагаме со девет модерни локомотиви кои ќе можат целосно да го покријат карго-превозот, а дел од нив да се користат и во патничкиот сообраќај“,
вели Николоски.
Според него, ова е особено важно за Коридорот 10, како и за Коридорот 8, а истовремено оваа инвестиција е дел и од пошироката визија за Скопје, во насока на подобрување на квалитетот на воздухот и воведување на градскиот воз.
Министерката за финансии Гордана Димитриеска-Кочоска вели дека овој договор претставува потреба за доверба што меѓународните финансиски институци ја имаат во нашите политики и во насока во која се движи државата.
„Тоа значи поголема конкурентност на домашната економија и нови можности за генерирање приходи“,
кажа таа.
Ова е пример, додаде таа, за интегриран пристап, не само инфраструктурна инвестиција, туку и институционално и управувачко зајакнување.