Средствата, како што се наведува во владиното соопштение, до крајот на неделата треба да бидат префрлени на сметките во земјата и потоа да почнат да се реализираат согласно планираното
Министерката за финансии Гордана Димитриеска-Кочоска денеска во Будимпешта го потпиша договорот за заем од Унгарската експорт-импорт банка, информираа попладнево од владината прес-служба.
Средствата, како што се наведува во владиното соопштение, до крајот на неделата треба да бидат префрлени на сметките во земјата и потоа да почнат да се реализираат согласно планираното.
„Со потпишување на договорот денеска обезбедуваме 500 милиони евра за буџетска поддршка, за поддршка на локалниот развој преку проекти во општините, како и за поддршка на економијата. Тоа беше повеќе од потребно за нашата економија, која во првиот квартал имаше многу слаба економска активност и бараше мерки кои ќе направат раздвижување и забрзување на економската активност“,
рече министерката за финансии по потпишување на договорот.
Според неа, неопходна била и реализацијата на проектите во општините затоа што, како што рекла Димитриеска-Кочоска, и тие ќе имаат позитивно влијание врз економската активност, а дополнително со нив ќе се решат и горливи проблеми на граѓаните.
Заемот е во износ од 500 милиони евра. Рокот на отплата е 15 години, со три години грејс период и каматна стапка од 3,25 отсто.
„Одлуката на Владата да го обезбедиме планираното надворешно задолжување со Буџетот за 2024 година преку билатерален заем од Унгарија, наместо со издавање нова еврообврзница, произлезе како резултат на поволните услови што ги добивме и заштедата што ја правиме само врз основа на каматата“,
рекла министерката.
Таа вели дека каматните стапки по кои би се добила оваа сума на меѓународниот пазар е околу 6 отсто и тоа е голема заштеда по буџетот по ова основа, односно заштеда на годишно ниво од околу 14 милиони евра. Дополнително, вели Димитриеска-Кочоска, и рочноста дава предност и помал ризик од потреба за рефинансирање.
Димитриеска-Кочоска вели дека ваквите услови се резултат и на политиките што ги води Владата, а за што, како што додава, минатата недела добиле потврда и од кредитната агенција „Фич“, којашто според неа има значајна улога за каматните стапки коишто ги добива земјата при задолжување на финансиските пазари.
„Она што е за потенцирање е дека делот од заемот кој ќе оди кон компаниите ќе биде пласиран исто така по поволни услови, што ќе влијае на отпочнување на еден инвестициски циклус во приватниот сектор од над 500 милиони евра со кој ќе се обезбедат повисоки стапки на економски раст“,
рекла Димитриеска-Кочоска.
Денешното потпишување на договорот следува откако по усвојување на Законот за задолжување кај Унгарската експорт-импорт банка во македонското Собрание на 17 септември годинава.
Заемот беше договорен кон средината на јули годинава од страна на премиерот Христијан Мицкоски и неговиот унгарски колега Виктор Орбан за време на нивната средба на маргините на Самитот на НАТО во Вашингтон.
Половина од средствата од позајмицата, односно 250 милиони евра, ќе бидат наменети за капитални проекти во општините, а другата половина за директна поддршка за македонската економија, односно заеми за компаниите.
При посетата на Северна Македонија на 27 септември унгарскиот премиер Виктор Орбан одговарајќи на новинарско прашање рече дека парите што ќе и бидат дадени на земјава се унгарски, а не кинески.
Претходно Саболч Пањи, главниот истражувачки новинар и уредник на истражувачкиот портал „Ви-сквер“ (VSquare) со седиште во Будимпешта објави дека Унгарија е во улога на параван на Кина во давањето заем од 500 милиони евра за Северна Македонија.