Целта на проектот е рехабилитација и надградба на локални патишта во должина од околу 450 километри и создавање подобри и побезбедни транспортни услови во 80 општини
Вкупно 450 километри патишта, во сите општини во државава, ќе се реконструираат, надградат и рехабилитираат со средства од Светска банка. Министерството за финансии и Светска банка денеска потпишаа договор со кој се обезбедуваат 37 милиони евра за Проектот за поврзување на локални патишта.
Проектот денеска го потпишаа министерот за финансии Фатмир Бесими и директорот на Канцеларијата на Светска банка за Република Северна Македонија и Косово, Масимилијано Паолучи, во присуство на министерот за транспорт и врски, Благој Бочварски. Вкупната вредност на Проектот изнесува 70 милиони евра.
„Единиците на локалната самоуправа се властите кои се најблиску до граѓаните, кои играат значајна улога во уредувањето на секојдневното живеење преку јавните услуги кои ги обезбедуваат. Оттаму, инвестициите во општинската инфраструктура, значи инвестиција во подобрувањето на животот на граѓаните, но и во поттикнување на економскиот развој преку развојот на нивните микроекономии. Понатаму, во време кога светската економија се соочува со крупни предизвици и кога во сите економии економскиот раст успорува, од исклучително значење е спроведувањето на инвестициската агенда за поттикнување на економската активност во овие исклучително сложени услови. Инвестицијата во патишта е секогаш квалитетна инвестиција“,
потенцира министерот Бесими.
Како што соопштија од Министерството за финансии, тој додал дека неделава е усвоен и Законот за финансирање на Единиците на локалната самоуправа, каде се поставени реформите за унапредување на фискалната децентрализација.
Проектот, според министерот за транспорт и врски Благој Бочварски, се реализира согласно предвидената динамика и досега се склучиле договори за градежни работи на локални патишта во 46 општини.
„Влезени сме во една поодмината фаза во реализација на овој проект и слободно можам да кажам дека бележиме добри резултати. Успеавме да ја подигнеме мобилноста и квалитетот на живеење на локално ниво во оние општини каде веќе се реализиа овој проект. Би сакал да потенцирам дека до сега Министерството за транспорт и врски преку Единицата за имплементација на проекти распиша четири јавни повици во кој се опфатени 46 општини со вкупно 94 улици и со вкупна инвестиција од преку 17 милион евра“,
подвлекува Бочварски.
Директорот на Канцеларијата на Светска банка, Паолучи, потенцирал дека нашата држава значително напредува во подобрувањето на националната патна инфраструктура и поврзаност, иако, сè уште постојат предизвиците што произлегуваат од реформите за управување и надградба на локалната патна мрежа, со цел развивање постабилен транспортен сектор низ земјата.
„Преку Проектот за поврзување на локалните патишта, Светска банка дава поддршка за зајакнување на капацитетите на државата во управувањето со локалните патишта и подобрување на пристапот до работни места, услуги и пазари. Целта на Проектот е рехабилитација и надградба на локални патишта во должина од околу 450 километри – создавање подобри и побезбедни транспортни услови во 80 општини коишто се вклучени во Проектот. Меѓу корисниците на овој проект се и рурални општини со високо ниво на сиромаштија и оние што се занимаваат со земјоделие, како и урбани општини и области со население со различна социо-економска позадина. Ова дополнително финансирање ќе ги надополни средствата од првичниот заем за Проектот за поврзување на локалните патишта – одобрен од Светска банка на 19 декември 2019 година – алоцирани како одговор на пандемијата на КОВИД -19“,
посочил Паолучи.
Во моментот со средства од Светска банка се реализираат проекти во вредност од над половина милијарда евра во земјава во инфраструктура, образование и земјоделство.