„Навистина работиме 24 часа на ден, седум дена во неделата, за да се приближиме до крајот на оваа брутална руска војна против Украина и да обезбедиме сите документи и чекори да бидат реални, ефикасни и сигурни“, кажа тој
Украинскиот претседател Володимир Зеленски соопшти дека разговарал со специјалниот пратеник на американскиот претседател Доналд Трамп, Стив Виткоф, и со неговиот зет, Џаред Кушнер, за можностите за завршување на војната со Русија.
„Беше навистина добар разговор, разговаравме за многу детали. Постојат некои нови идеи за тоа како да се приближиме до вистински мир, а тие се однесуваат на форматот, состаноците и временската рамка“,
објави Зеленски на Телеграм.
На разговорот присуствувале и секретарот на Советот за национална безбедност и одбрана на Украина, Рустем Умеров, началникот на Генералштабот Андриј Хнатов, министерот за надворешни работи Андриј Сибиха, заменик-министерот за надворешни работи Серхиј Кислица, како и други членови на украинскиот преговарачки тим.
Според него, главниот украински преговарач, Рустем Умеров, вечерва планира уште еден разговор со американските преговарачи.
„Навистина работиме 24 часа на ден, седум дена во неделата, за да се приближиме до крајот на оваа брутална руска војна против Украина и да обезбедиме сите документи и чекори да бидат реални, ефикасни и сигурни“,
рече тој.
Трамп се залага за договор за завршување на речиси четиригодишната војна, а во последните недели, мировните напори предводени од Виткоф и Кушнер бележат постепен напредок.
Претходно, Зеленски презентираше нацрт-план за мир од 20 точки, кој го опиша како главна рамка за завршување на војната.
Нацртот претставува скратена верзија на оригиналниот план од 28 точки што Соединетите Американски Држави претходно го дискутираа со руската страна, а кој се сметаше за во голема мера прифатлив за Москва бидејќи вклучуваше отстапување на територија и ограничување на големината на украинската армија.
Клучните територијални прашања во новиот нацрт од 20 точки сè уште остануваат нерешени, како што вели Зеленски, додавајќи дека за решавање на најчувствителните прашања ќе биде потребна директна средба со Трамп.