Така, малопродажната цена на еуросупер БС-95 од ноќеска на полноќ ќе изнесува 77,5 денари за литар, еуросупер БС-98 ќе се продава по цена од 79,5 денари за литар, еуродизел БС (Д-Е V) за 73, а екстра лесното масло за горење (ЕЛ-1) за 72 денари за литар
Од ноќеска на полноќ бензините ќе се продаваат за цена повисока за 1,5 денари за литар, додека цената на дизелот се зголемува за еден денар, а на екстра лесното масло за два денари за литар. Ова е одлуката за новата цена на горивата што денеска ја донесе Регулаторната комисија за енергетика, водни услуги и услуги за управување со комунален отпад (РКЕ).
Со неа, како што соопшти РКЕ, малопродажните цени на нафтените деривати се зголемуваат во просек за 2 отсто во споредба со претходната одлука.
Така, малопродажната цена на еуросупер БС-95 ќе изнесува 77,5 денари за литар, еуросупер БС-98 ќе се продава по цена од 79,5 денари за литар, еуродизел БС (Д-Е V) за 73, а екстра лесното масло за горење (ЕЛ-1) за 72 денари за литар.
Малопродажната цена на мазутот М-1 НС останува непроменета и тој ќе се продава за 41,687 денари за килограм.
Според РКЕ, референтните цени на нафтените деривати на светскиот пазар во споредба со претходната пресметка бележат зголемување кај бензините во просек за 6,182 отсто, кај дизелот за 2,172, кај екстра лесното масло за 6,442 и кај мазутот за 2,609 отсто.
Курсот на денарот во однос на доларот по кој беа формирани цените со претходната пресметка е повисок за 0,1578 отсто.