На тукушто акредитираниот амбасадор на Бугарија во земјава, Жељазко Радуков, денеска му е врачена протестна нота за ситуацијата во која претседателите Румен Радев и Гордана Сиљановска-Давкова се ракуваа само пред бугарското, а без македонското знаме
Посетата на претседателката на Република Северна Македонија, Гордана Сиљановска-Давкова, не беше ниту државна ниту работна посета, изјави денеска бугарскиот претседател Румен Радев, а пренесува Фокус.бг, што е негов прв коментар за случајот што предизвика реакции поради отсуството на македонското знаме на нивната заедничка фотографија во петокот во Софија.
„Имавме многу искрен и конструктивен разговор со претседателката на Република Северна Македонија кој помина во пријателска атмосфера. Очекувам оваа искажана желба за отвореност да ја пренесе Владата на РСМ. Но, да биде јасно дека ова не беше ниту државна ниту работна посета“,
вели Радев.
Се надева оти Сиљановска-Давкова наскоро ќе дојде во Бугарија во рамки на државна посета.
„Со тоа, со сите официјални средби, согласно протоколот, ќе придонесе и за натамошен развој на нашите односи. Ако го следиме протоколот, на ред е јас да одам таму“,
рече тој.
Средбата, како што посочи, била конструктивна и во пријателски дух.
„Ова е навистина добар почеток за целосно да ѝ помогнеме на Република Северна Македонија“,
вели бугарскиот претседател.
На тукушто акредитираниот амбасадор на Бугарија во земјава, Жељазко Радуков, денеска му е врачена протестна нота за ситуацијата во која претседателите Румен Радев и Гордана Сиљановска-Давкова се ракуваа само пред бугарското, а без македонското знаме.
Од Министерството за надворешни работи велат дека протестна нота е врачена поради протоколарниот пропуст на бугарската страна.
Извори во МНР објаснуваат дека тимови за протокол од двете страни, во периодот пред средбата, ги утврдиле сите детали кои предвидувале фотографирање на двајцата претседатели само во работните простории на Радев, а не и при ракувањето пред кабинетот, локација каде што македонското знаме го нема.
Објаснувањето од Министерството зошто веднаш не се реагирало, туку тоа се прави откако за случајот се крена врева во домашната јавност, е дека се имало обѕир за ситуацијата зашто само неколку часа претходно се случи авионска несреќа во која загинаа двајца пилоти на бугарското воено воздухопловство.
Претходно премиерот Христијан Мицкоски најави дека денеска ќе му биде врачен демарш на амбасадорот на Република Бугарија во земјава.
Она што е поважно, како што рече, е што Европа и светот можат да видат на отворена сцена, кои се вистинските намери на водството во Софија.
„Не се вистинските намери Бугари во Уставот, тоа е најмалиот проблем. Таму многу е поголема потребата да покажат мускули и да ги покажат своите вистински намери. Европа и светот можеа да видат дека не е Бугарите во Устав вистинската намера на официјална Софија, туку многу повеќе од тоа“,
вели премиерот.
Димитар Стојанов, актуелен советник на бугарскиот претседател Радев, прашан зошто на средбата не било истакнато македонското знаме, рече дека средбата на македонската претседателка била од неформален карактер.
Според него, посетата која беше во Бугарија на претседателката на Република Северна Македонија била културна посета.
„Тоа не беше ниту официјална, ниту државна, ниту работна посета. Таквите посети не бараат сите елементи на државниот протокол да бидат применети“,
рече тој.
Претходно од кабинетот на претседателката Сиљановска-Давкова изјавија дека ќе побараат објаснување од бугарската страна оти, како што велат, иако не било предвидено да има фотографии во затворениот простор, но пред почетокот на тет-а-тет средбата, претседателот Радев ја поканил претседателката да направат заедничка фотографија пред бугарското знаме.
Претседателката Гордана Сиљановска-Давкова во петокот присуствуваше на настапот на Националната опера и балет (НОБ) во главниот град на соседна Бугарија, Софија. Во Софиската опера и балет, Националната опера и балет ја изведе операта „Набуко“ од Џузепе Верди, со што беше отворена оперската сезона во Софија.
На настанот, покрај претседателката, присуствуваа и министерот за надворешни работи и надворешна трговија Тимчо Муцунски и министерот за култура и туризам Зоран Љутков.