Во соопштението на Обвинителство за гонење на организиран криминал и корупција се наведува и оти тој во периодот од октомври до 13 декември, тој примил вкупно 50 000 евра за посредување, со цел да влијае кај судијата
По вчерашното лишување на слобода на поранешниот државен правобранител, Фехми Стафа, од Основното јавно обвинителство пристигна соопштение за тоа што претходело на неговото апсење. Од ОЈО ГОКК велат дека во периодот од октомври до 13 декември 2025 година, осомничениот примил вкупно 50 000 евра за да посредува и да го искористи своето реално влијание со цел интервенција кај судија во Апелациониот суд Скопје. Намерата била, како што велат, преку поткуп, да се влијае врз извршување службено дејствие кое не смеело да биде преземено.
Истрагата утврдила дека Стафа првично побарал 100 000 евра за да обезбеди укинување на мерката притвор определена за лице кое е недостапно за органите на прогонот и против кое ОЈО ГОКК води посебна постапка за кривични дела поврзани со јавните финансии, платниот промет и стопанството.
„На 6 октомври 2025 година, тој примил 30 000 евра од побараниот износ, кои му ги предала сестрата на лицето во бегство. На 13 декември 2025 година, осомничениот директно побарал и примил дополнителни 20.000 евра, наводно наменети како поткуп за судијата“,
се вели во соопштението.
Непосредно по примањето на парите, осомничениот бил лишен од слобода, при што кај него биле пронајдени и одземени паричните средства. Поради опасност од бегство, можност за повторување на кривичното дело и ризик од влијание врз текот на постапката, за него е побарана мерка притвор.
Но во соопштението, не се наведува каква улога имале судијата и сестрата на лицето кое што е во бегство.
Инаку, Фехми Стафа ја извршуваше функцијата државен првобранител од август во 2018 година до 23 август 2022 година кога беше разрешен.
Полициски службеници по наредба на јавен обвинител од Основното јавно обвинителство за гонење на организиран криминал и корупција го лишија од слобода Ф.С. поради сторено кривично дело – Примање награда за противзаконито влијание.
Во периодот од октомври до 13.12.2025 година осомничениот примил вкупен износ од 50.000 евра за да посредува и да го искористи своето реално влијание за да интервенира кај судија во Апелациониот суд Скопје и за со поткуп кон судијата да влијае за да се изврши службено дејствие што не би смеело да се изврши.
Првично, осомничениот побарал 100.000 евра за да влијае за укинување на мерка притвор определена кон лице кое е недостапно на органите на прогонот и против кого ОЈОГОКК води друга постапка за кривични дела против јавните финансии, платниот промет и стопанството. На 06.10.2025 година примил дел од побараниот износ и тоа 30.000 евра, што му ги предала сестрата на лицето во бегство. На 13.12.2025 година директно побарал и примил уште 20.000 евра како дел од поткупот што го барал за да го даде на судијата.