Бугарија никогаш нема да ѝ објави војна на Македонија. Тоа е лудост. Но, тој предизвикувачки и агресивен тон му дозволува на западниот сосед за нас да создаде народ кој искрено ќе почне да нè мрази. Ако треба да се направи паралела, тоа е паралелата и тоа е моето предупредување, вели Стојанов во интервју за БТВ, на прашање дали може да се направи паралела со руско-украинската ситуација
Политичарите и општественици треба да престанат со агресивниот и предизвикувачки тон во однос на Северна Македонија, смета поранешниот бугарски претседател Петар Стојанов.
Во интервју за БТВ, Стојанов, кој беше бугарски претседател од 1997 до 2002 година, оцени дека колку и да се заострени позициите, дијалогот меѓу двете братски држави мора да се води во пријателски тон.
На прашањето дали може да се направи паралела на ситуацијата со Русија и Украина, Стојанов вели дека таа може да се сведе само на тоа дека Бугарија никогаш нема да ѝ објави војна на С Македонија.
„Бугарија никогаш нема да ѝ објави војна на Македонија. Тоа е лудост. Но, тој предизвикувачки и агресивен тон му дозволува на западниот сосед за нас да создаде народ кој искрено ќе почне да нè мрази. Ако треба да се направи паралела, тоа е паралелата и тоа е моето предупредување“,
вели Стојанов.
Стојанов нагласи дека во Бугарија премногу се робува на јавното мислење и дека вистинските државни лидери мора да го креираат јавното мислење, особено кога станува збор за историски одлуки, како што беше зачленувањето на Бугарија во НАТО и ЕУ.