Поради замрзнатиот дожд отежнато се одвива и железничкиот сообраќај во Виена
Аеродромот во Виена утрово е затворен поради дебел слој мраз што е формиран на патеките за возење и на пистите.
Портпаролот на аеродромот, Питер Клеман, за австриската новинска агенција вели дека екипите за зимско одржување се целосно оперативни и интензивно работат на што побрзо одмрзнување на пистата.
Поради привремениот прекин се откажани или пренасочени голем број летови.
„На патниците им беше советувано да се консултираат со своите авиокомпании за статусот на резервираните летови. Доколку летовите се откажани, ги молиме патниците да не доаѓаат на аеродромот“,
вели портпаролот.
Летовите што требало да слетаат на овој аеродром биле пренасочени кон други аеродроми – како што се Минхен, Франкфурт, Келн и Венеција.
Поради замрзнатиот дожд отежнато се одвива и железничкиот сообраќај во Виена, во Долна и Горна Австрија и во Бургенланд. Отежнат е железничкиот сообраќај и кон аеродромот во Грац.
Поради замрзнатиот дожд е затворен аеродромот во Братислава, а ограничено работи и аеродромот „Вацлав Хавел“ во Прага.