Од Секторот за хидрологија при Управата за хидрометеоролошки работи (УХМР) велат дека поради високиот водостој на неколку реки во земјата постои опасност од излевање на речните корита во повеќе региони
Обилните врнежи од дожд во текот на викендот предизвикаа проблеми низ целата држава. Од Центарот за управување со кризи (ЦУК) велат дека најкритична е состојбата во Кичево и во Гостивар, каде екипите на противпожарната единица, полицијата и комунални служби биле на терен во текот на целата ноќ.
Според ЦУК, најкритична состојба е регистрирана во селото Форино, кое е најпогодено од поплавите. Поплавени се и земјоделски површини во селата Чајле, Турчане, Врапчиште и Беловиште.
Во Југозападниот Регион, во Кичево, на улица „Прилепска“, од ЦУК велат дека е регистрирано најголемо поплавување на куќи и евакуирани се 220 лица, кои се сместени во спортската сала „Христо Узунов“. Заезерувања имало и на улицата „29 Ноември“ во населбата Подварош, каде се поплавени подруми во повеќе куќи.
Од ЦУК велат дека се поплавени и објекти на болницата во Кичево.
„Организирана е достава на храна и вода за загрозените лица со поддршка на Црвен крст, а на терен активно работат екипи од полицијата, комуналното претпријатие и противпожарната служба“,
се вели во утринското соопштение од ЦУК.
Поплавени земјоделски површини има и во селото Опае во Општина Липково, каде што е излеана Слупчанска Река. Во Североисточниот Регион поплавени земјоделски површини има и во селото Оризаре, а во Куманово, во селото Доброшане на локацијата Шупли Камен, кај мостот на Кумановска Река има насобрани пластични шишиња, но засега нема опасност од излевање на реката, додаваат од ЦУК.
Надлежните велат дека во Скопскиот Регион, во Општина Сарај состојбата е мирна и се следи, додека во Општина Зелениково има минимално излевање на реката Вардар кај селата Пакошево и Ново Село, но оти нема непосредна опасност.
Во Југоисточниот Регион, во Струмица, засега нема пријавени штети од врнежите од дожд, а кај селото Суви Лаки кон Берово бил пријавен одрон, за што биле известени надлежните служби.
Во Источниот Регион, во Пробиштип, од ЦУК велат дека бил регистриран прекин во снабдувањето со електрична енергија во селата Долни и Горни Стубол и оти екипи на ЕВН работат на отстранување на дефектот.
Од Секторот за хидрологија при Управата за хидрометеоролошки работи (УХМР) велат дека поради високиот водостој на неколку реки во земјата постои опасност од излевање на речните корита во повеќе региони.
Според последните мерења, реката Вардар во своето горно течение бележи исклучително висок водостој кој се задржал во текот на целата ноќ. Опасноста од излевање во овој дел сè уште е активна. Слична е состојбата и со реката Треска, каде иако е забележано опаѓање на нивото, водата е сè уште на критично ниво и постои опасност од излевање на реката на некои делници по течението.
Од УХМР велат дека зголемен водостој има и на река Црна, и во текот на денот се очекуваат локални заезерувања во Демирхисарскиот и во Пелагонискиот Регион.
Иако кај Кичевска Река се забележува постепено повлекување на водата, на терен сè уште има поплавени површини и заезерени делови.
До крајот на денот се очекува високиот водостој на Вардар во горното и средното течение и зголемување на нивото на реката во долното течение кон Демир Капија и Гевгелија.
УХМР предупредува на претпазливост при движењето покрај речните корита и суводолиците во текот на целиот ден.