Како последица на врнежите, утрово се појавија свлечишта на експресниот пат Радовиш – Штип и на патниот правец Злетово – брана Кнежево, велат од ЦУК
Обилните врнежи од дожд кои го зафатија источниот регион од земјава предизвикаа поплавување на простории и дворови во повеќе објекти на различни локации во општина Чешиново – Облешево и околните села, соопшти Центарот за управување со кризи (ЦУК). Директорот на ЦУК, Мухамед Али информира дека повеќе институции и локалната самоуправа се активно ангажирани на терен со сите расположливи ресурси.
„Во интервенциите учествуваат и ТППЕ Кочани, Водостопанство „Брегалница“ и РЦУК – Кочани. Побарана е и дополнителна материјално-техничка поддршка, особено за испумпување вода од поплавените објекти,“
вели директорот на ЦУК, Мухамед Али.
Али додава дека реките Брегалница и Кочанска река имаат значително зголемен водостој, додека на одредени локации во општините Штип и Чешиново – Облешево е забележано нивно излевање од коритата.
„Како последица на врнежите, утрово се појавија свлечишта на експресниот пат Радовиш – Штип и на патниот правец Злетово – брана Кнежево. За настаните од страна на ЦУК веднаш беше информирано ЈП Македонија пат, чии екипи излегоа на терен и интервенираа соодветно,“
додава Али.
Од ЦУК соопштија дека е забележано лизгање на земјиште во село Липково, кај место викано Кисела Вода. За овој случај, како што се наведува од ЦУК, Општина Липково веќе информирала дека располага со ограничени ресурси за интервенции од ваков тип, поради што побарала да се вклучат државните институции во санирање на свлечиштето.