Бројот на попишани граѓани до денеска до 15 часот надмина еден милион, информираше Државниот завод за статистика (ДЗС).
Точниот број на попишани лица изнесува 1 000 034.
„Државниот завод за статистика ја информира јавноста дека попишувањето оди во најдобар ред и согласно планираниот интензитет. Граѓаните кои имаат дилеми и нејаснотии во врска со процесот на попишување можат да се обратат во Бирото за попис и на телефонските броеви кои се објавени на веб-страницата popis2021. stat.gov.mk. Успешноста на оваа статистичка операција зависи од сите нас и е за сите нас!“,
порачуваат од ДЗС.
Во петокот, директорот на ДЗС, Апостол Симовски, изјави дека очекува викендов да се надмине бројката од еден милион, повторно потенцирајќи дека пописот се одвива со посакуваниот интензитет.
Тој рече дека бројот на граѓани кои одбиваат да се попишат е незначителен, но по разговорите кои ги спроведуваат со нив, кај оваа група нема двоумења и се попишуваат.
Покрај граѓаните, се попишува и бројот на станови и домаќинствата. Од ДЗС во последната објава нема информација колку станови и домаќинства се попишани до 15 часот денеска, а она што е познато е дека заклучно со вчера до 20 часот се попишале 297 089 домаќинства и 402 768 станови.
Пописот започна на 5 септември и ќе трае до 30 септември.