Според него, постои доза на скептицизам дали ова барање ќе биде прифатено од официјална Софија бидејќи изгледа дека некои нивни владини претставници имаат задни намери, односно дека отворањето на Уставот може да биде само почеток за други барања и изговори за идни блокади
Ако пречка за македонските евроинтеграции е само внесувањето на Бугарите во Уставот, тогаш не би требало да биде проблем заедно со соседна Бугарија да поднесеме резолуција во Европскиот парламент (ЕП), која ќе ја гарантира македонската идентитетска и јазична посебност, а истовремено ќе ја зголеми и довербата меѓу двете земји. Ова денеска на прес-конференција го рече Антонијо Милошоски, потпретседателот на Собранието од редовите на ВМРО-ДПМНЕ и член на Извршниот комитет на партијата, откако оваа иницијатива вчеравечер во интервју за ТВ Канал 5 ја даде и премиерот Христијан Мицкоски, за заедничка резолуција со Бугарија во ЕП, со која, како што рече, јасно и недвосмислено би се потврдиле македонскиот јазик и идентитет како посебни.
Според Милошоски, оваа отворена понуда Мицкоски ја дал и до бугарскиот претседател Румен Радев и до нивната влада.
„Уште веднаш можеме да поднесеме заедничка резолуција, да ја зацврстиме меѓусебната соработка на овој план и да го решиме проблемот за отпочнување на европските интеграции. Понудата што е дадена од премиерот Мицкоски е отворена“,
вели тој.
Сепак, додава дека постои доза на скептицизам дали ова барање ќе биде прифатено од официјална Софија, бидејќи изгледа дека некои нивни владини претставници имаат задни намери, односно дека отворањето на Уставот може да биде само почеток за други барања и изговори за идни блокади.
„Реалноста е дека добар дел од официјалните претставници на Бугарија работат на негација на македонскиот идентитет и јазик, нешто слично како што Русија ја негира самобитноста на украинскиот народ и неговата посебност“,
рече пратеникот.
Милошоски обвини и дека помош за ова, официјална Софија добива и од некои претставници на Социјалдемократскиот сојуз (СДСМ).
„Претседателот на СДС е подготвен сервилно да изгласа се што Бугарија ќе стави на маса, а тоа го потврди и самиот Венко Филипче во неколку негови настапи“,
кажа тој.
Премиерот Христијан Мицкоски понуди иницијатива за заедничка резолуција со Бугарија во ЕП, со која ќе се потврди посебноста на македонскиот идентитет и јазик.
Со тоа, смета дека конечно би се ставил крај на отворените прашања и недоразбирања што со години го оптоваруваат европскиот пат со Северна Македонија.
Според него, суштината не е во вметнувањето на неколку стотици граѓани во Уставот, а при неговите посети на Брисел се обидувал да ја претстави сржта на проблемот кој трае со децении.
„Секогаш сум им велел да направивме елементарен чекор – да се обидеме во Европарламентот со мнозинство гласови да донесе одлука или резолуција, или ќе биде дел од извештај, со кој јасно ќе се признае како посебен македонски јазик и идентитет. Она што можеше Европа да види дека не е само промена на Уставот единствено нешто да направиме за да може да продолжиме, впрочем многу влијателни фигури во Бугарија тоа го кажуваат“,
рече Мицкоски.