Претходно денеска лидерот на СДСМ, Венко Филипче, кој е во посета на Кочани, пред партиските членови и граѓаните ја коментираше одлуката на Владата за прогласување на Пониква за рехабилитациски центар. Рече дека во Пониква не може да се отиде ниту на одмор, а не, пак, да се третираат толку сериозни медицински состојби
Владата на денешната седница и официјално го прогласи туристичкиот центар Пониква во центар за рехабилитација на повредените од трагедијата во Кочани.
Оттаму оценија дека со своите природни и технички услови, Пониква е соодветна локација за спроведување на рехабилитацијата на повредените од пожарот, за кои ќе биде обезбедено сместување, медицински и физиотерапевтски третман, како и психолошка поддршка за нив и нивните семејства.
„Планот, распоредот, начинот на спроведување на продолжената медицинска рехабилитација, како и обезбедувањето на соодветни медицински тимови, ќе биде изготвен од страна на ЈЗУ Општа болница со проширена дејност – Кочани, во соработка со Министерството за здравство, јавните здравствени установи вклучени во третманот и рехабилитацијата на повредените пациенти, како и во согласност со потребите и состојбата на самите пациенти и нивните семејства“,
наведуваат од Владата.
Согласно одлуката, Владата го задолжи МВР да ги стави на располагање сместувачките капацитети во одморалиштето „Пониква“ во период од 10 јуни до 20 август. Министерството за здравство, пак, доби задолжение да изработи оперативен план за рехабилитација во соработка со болницата во Кочани и владината работна група.
Претходно денеска лидерот на СДСМ, Венко Филипче, кој е во посета на Кочани, пред партиските членови и граѓаните ја коментираше одлуката на Владата за прогласување на Пониква за рехабилитациски центар.
„Луѓето имаат реален проблем, а тие им го нудат центарот Пониква за некаква рехабилитација. Во Пониква не можеш ни на одмор да одиш, а не пак да третираш толку сериозни медицински состојби“,
рече Филипче.