Мартин Китанов низ солзи раскажуваше како го доживеал и преживеал кобниот пожар. Во „Пулс“ бил со четворица другари за да го прослават раѓањето на синот на едниот од нив. За пожарот станале свесни кога од бендот кажале сите да излезат надвор
И сведокот Тоше Трендафилов рече дека имало малолетници во „Пулс“ критичната вечер, кога во пожар загинаа 63 лица, а повеќе од 200 беа повреди. Меѓу повредените е и тој. Имал изгореници на ушите и на вратот, а му била пресадена кожа на едната рака.
Како и на претходните двајца сведоци, и нему обвинителството првин го прашуваше во врска со внатрешноста на кабарето. Сите посочија дека имало промени во внатрешноста бидејќи било реновирано. Сведоците беа прашани и за продажбата на билетите, односно дали можеле да ги купат малолетници, како и за безбедносните мерки во „Пулс“. Прашан како знае дека имало малолетници, сведокот Трендафилов рече дека ги знае децата. И тој, како и другите сведоци денеска, кажа дека никогаш не забележал противпожарни апарати внатре во објектот.
За ноќта на 16 март 2025 година рече дека во моментот кога почнал да се шири црн чад кој задушувал, настанал вистински хаос.
„Кога стигнав до вратата, беше хаос, имаше полно паднати деца. Паднав и почнав да повраќам. Ме удираа и ме газеа луѓе што се обидуваа да се спасат. Тогаш се онесвестив. Некој ме извлекол“,
рече Трендафилов.
Тие што го извлекле биле двајцата негови другари Драганчо Анчов и Николчо Ефремов. Кога излегол надвор, ги забележал полицајците.
„Им пружив рака на полициските службеници, но тие ми рекоа да се тргнам. Друга помош не ми пружија“,
рече сведокот.
На прашањето какви последици има од повредите, Трендафилов рече:
„Ме боли раката и ми се враќаат спомени од настанот, поради што не можам да спијам“.
Бранителката на првообвинетиот сопственик на „Пулс“, адвокатката Ивана Коцевска, побара од судот да не го прифати исказот на Трендафилов. Според неа, неговото сведочење не е кредибилно бидејќи многу од неговите наводи се спротивни на веќе утврдените факти. Рече дека зборувал произволно и без свое убедување, односно дека за повеќе околности говорел иако бил директен сведок.
По него сведочеше Мартин Китанов, кој низ солзи раскажуваше како го доживеал и преживеал кобниот пожар. Во „Пулс“ бил со четворица другари, за да го прослават раѓањето на синот на едниот од нив. За пожарот станале свесни кога од бендот кажале сите да излезат надвор.
„Кога почна да гори, односно кога пејачот рече да излегуваме, видовме пламен и се упативме кон излезот. Додека да стигнеме таму, огнот веќе направи линија и почна да се се шири густ чад и да се дише тешко. Меѓу двете врати настана метеж, луѓе паѓаа едни врз други. Паднав и јас со други пет лица. Други лица паднаа врз нас. Јас кога паднав почувствував многу силни болки. Прв што ми подаде рака беше Лазар Захариев од обезбедувањето, но не успеа оти врз мене имаше многу луѓе. Продолжи да ги трга луѓето што беа погоре. Јас чувствував големи болки, не можев да дишам бидејќи имаше многу луѓе врз мене“,
рече тој.
Во тие моменти видел пожарникари, кои му ја вратиле надежта дека ќе преживее. Но и тие не успеале да го извлечат.
„Тогаш изгубив надеж, тогаш се сетив на моите две деца и најдов сила да продолжам да дишам. Во целата ситуација дојде едно момче, го видов како ангел спасител, тргаше некого над мене. Почнав да го штипам за да ме види и да ми помогне. Ме фати за двете раце и ми рече: ‘братче, ајде%. Како во секунда да добивме сила и двајцата. Ме извлече со спуштени фармерки до колена и без патики. Едно девојче дојде и ме праша дали сум добар“,
рече Китанов.
Во тие моменти кажа дека не чувствувал оти е повреден и мислел на другарите за кои не знаел каде се.
„Во тој момент сакав да се вратам и да ги барам моите другари. Луѓето околу мене рекоа дека нозете ми се крвави. Тогаш почнав да губам сила. Седнав на тротоарот и доживеав стрес, ми се вкочанија и рацете и нозете. Гледав пред мене лоша слика. Деца, луѓе паѓаа, се онесвестуваа, а јас не можев ништо да направам. Прашував за моите другари. Седев сè додека не видов едно дете од моето село целото црно во лицето и повеќе не можев да седам. Ми текна дека мој пријател е на работа во бензинската. Се качив во автомобилот и стигнав до бензинската, не можев да се паркирам. Застанав, ја отворив вратата и паднав на грб. Две девојчиња ме седнаа. Им ѕвонев на другарите повеќе од 20 пати, но никој не се јавуваше. Не сакав да си одам дома бидејќи не знаев што да кажам на моите и на нивните родители“,
рече сведокот.
Брат му, кој живее во Скопје, дошол и го однел „Систина“, каде што му направиле прегледи, а добил и психолошка помош. На крајот кажа дека од петтемина другари, колку што биле на масата, преживеал само тој.
„И ден-денеска не знам што се случи со нив, каде заглавија”,
кажа Китанов.
Одговарајќи на прашање на обвинителот рече дека чадот што се ширел во дискотеката бил густ и кисел. Тој не вдишал многу бидејќи лежел, а чадот бил во горните делови на објектот.
На денешното рочиште не сведочеше Дарио Трифунов бидејќи одбраната на дел од обвинетите реагираше дека не бил уредно најавен од Обвинителството. Исказот тој ќе го даде на некое од следните рочишта.
Следното е закажано на 2 февруари, за кое се повикани искази да дадат пет сведоци на Обвинителството.