Во западните украински градови Лавов и Тернопил се слушнале експлозии откако украинските вооружени сили пријавија руски напади со дронови и ракети, јавија украинските медиуми
Полска привремено ги затвори аеродромите во Жешов и Љублин на југоистокот од земјата откако армијата крена авиони поради руски напади во Украина, соопшти полската агенција за воздухопловство.
„Поради потребата да се обезбеди слобода на дејствување за воената авијација, аеродромите во Жешов и Љублин беа привремено затворени“,
напиша агенцијата на социјалната мрежа Икс.
Агенцијата подоцна соопшти дека аеродромите продолжиле со работа.
Во меѓувреме, во западните украински градови Лавов и Тернопил се слушнале експлозии откако украинските вооружени сили пријавија руски напади со дронови и ракети, јавија украинските медиуми.
„Русија повторно ја напаѓа нашата енергетска инфраструктура. Има итни прекини на електричната енергија во голем број украински региони“,
напиша украинското Министерство за енергетика на Телеграм.
Засега не се знае целосниот обем на штетата.
Украинските медиуми јавија дека во Тернопил била погодена повеќекатна станбена зграда, а очевидец изјавил дека за време на нападот имало прекини на електричната енергија во Лавов.
Гувернерот на регионот Лавов, Максим Козицки, на Телеграм напиша дека нападот оштетил енергетски објекти и индустриски објект, но немало жртви.