Одлуката вчера ја донесе Владата, со цел да се намали оптоварувањето на здравствениот систем од коронавирусот, како и да се избегне потенцијално затворање за верските празници Велигден и Бајрам
Наместо во 22 часот, како што беше во изминатите неколку седмици, полицискиот час вечерва почна во 20 часот, на територија на целата држава, а ќе трае, како и досега, до 05 часот изутрина. Во текот на овој временски период, движењето ќе биде ограничено.
Полицискиот час ќе трае две недели, поточно до 20 април. Одлуката вчера ја донесе Владата, со цел да се намали оптоварувањето на здравствениот систем од коронавирусот, како и да се избегне потенцијално затворање за верските празници Велигден и Бајрам. Што се однесува до објектите кои вршат подготовка и продажба на храна, тие може да продаваат преку онлајн или телефонска нарачка и да вршат достава на храна или самостојно подигнување на нарачката надвор од угостителскиот објект, преку пулт.
Сите граѓани кои живеат во станбени објекти за колективно домување и кои имаат домашни миленичиња да може да ги изнесуваат надвор од своите домови во вечерните часови, во времетраење од еден час, почнувајќи од 22:00 часот до 23:00, најмногу до 100 метри од објектот во кој живеат.
На граѓаните кои се вакцинирале во центрите за имунизација во период пред полицискиот час ќе им се дозволи враќање во своите живеалишта врз основа на потврда.
Целта на овие рестрикции, според надлежните, е да се заштити здравјето на граѓаните и да се олесни притисокот врз болничките капацитети и здравствените работоници.