При претресот во домот на Бајрами, полицијата нашла и запленила готовина од околу 50 илјади швајцарски франци
Полициски службеници од утрово вршат претреси на повеќе локации поради постоење сомнежи за сторен организиран криминал во „Државна лотарија“, пренесуваат дел од медиумите. Според нивните информации, претрес е извршен и во домот на поранешниот вицепремиер Артан Груби, како и кај поранешниот директор на Лотарија, Прпарим Бајрами. И двајцата не се пронајдени во своите домови.
Од Министерството за внатрешни работи (МВР) официјално не соопштија детали за ваквите наводи.
Груби доцна синоќа се огласи на својот фејсбук-профил и информациите што од вчера попладне се шират во јавноста оти тој избегал од земјава ги оцени како шпекулации.
„Денеска патував за приватна посета. Ве молам, немојте да измислувате и шпекулирате. Редовно патував со моите патни исправи и за ова е известено и моето лично полициско обезбедување“,
пишува Груби во објавата.
Тој додава и дека веднаш штом ќе ги заврши обврските за кои отпатувал ќе се врати дома.
Инаку, како што информираат медиумите, постојат сомнежи дека Бајрами уште од пред неколку месеци се наоѓа во Косово.
При претресот во домот на Бајрами, полицијата нашла и запленила готовина од околу 50 илјади швајцарски франци.
Се очекува, како што велат дел од медиумите, Министерството за внатрешни работи (МВР) да издаде потерници за Бајрами и Груби.