Станува збор за 71-годишен маж од Левице, кој со пиштол што, како што пренесуваат словачките медиуми, законски го поседувал, го застрерал премиерот Фицо во пределот на градите и на стомакот
Словачката полиција го идентификувала осомничениот кој денеска пукал во словачкиот премиер во Хандлова, додека тој пред Домот на културата се поздравувал со граѓаните.
Станува збор за 71-годишен маж од Левице, кој со пиштол што, како што пренесуваат словачките медиуми, законски го поседувал, го застрерал премиерот Фицо во пределот на градите и на стомакот.
Напаѓачот веднаш бил приведен од полицијата.
Според последните иформации, словачкиот премиер се наоѓа во животозагрозувачка состојба и со хеликоптер е префрлен во Банска Бистрица.
На социјалните мрежи се појави видео на кое се гледа како обезбедувањето го внесува ранетиот Фицо во автомобил.
Како што пренесуваат словачките медиуми, очевидците што присуствувале на настанот рекле дека напаѓачот пред да пука го повикал премиерот со зборовите: „Дојди ваму“.
Инаку, Фицо како лидер на словачката левица беше назначен за премиер на Словачка по четврти пат на крајот на октомври минатата година. Тогаш во предизборната кампања вети дека ќе ја прекине воената поддршка за Украина и го критикуваше воведувањето санкции против Русија.
Затоа многу пати го обвинувале и дека ја води надворешната политика на Словачка во корист на Кремљ.