Досега се регистрирани 6 404 прекршоци за неносење лична заштита на лицето (маска, марама или шал), а од нив 641 се констатирани во текот на изминатото деноноќие, информираше министерот за внатрешни работи Наќе Чулев.
„Во текот на изминатото деноноќие на територијата на целата држава на вкупно 435 лица им се издадени решенија за изолација, а 75 лица потпишале изјави за самоизолација. Од страна на полициските службеници извршени се контроли кај лица во изолација и самоизолација при што се евидентирани 2 лица кои не ги почитувале овие мерки. Во државен карантин спроведени се 123 лица“,
објави Чулев.
МВР, вели тој, во координација со Државниот пазарен инспекторат извршило 776 контроли во објекти, при што се евидентира седум кои не ги почитувале одлуките на Владата.