Еврокомесарите разговарале за тоа прашање во текот на вчерашниот ден, по ненадејната посета на шефицата на ЕК, Урсула фон дер Лајен, во саботата на Украина
Европската комисија ќе препорача Украина да добие официјален статус на земја кандидат за членство во ЕУ, објавува бриселскиот портал „Политико“, повикувајќи се на неколку неименувани дипломатски извори.
Еврокомесарите разговарале за тоа прашање во текот на вчерашниот ден, по ненадејната посета на шефицата на ЕК, Урсула фон дер Лајен, во саботата на Украина.
„Комисијата не заборава дека Украина е единствената земја во Европа каде што умираат луѓе, каде што врз луѓе се пука затоа што носат знамиња на ЕУ на улиците“,
пренесува Политико изјава на високопоставен функционер на ЕУ. Тој додал дека сега на Украинците не може да им се каже „извинете, веевте погрешни знамиња“.
За да се додели кандидатски статус на Украина потребен е консензус на сите 27 шефови на држави и влади на состанокот на Европскиот совет закажан за наредната седмица.
Официјални лица и дипломати во Брисел сепак посочуваат дека најмалку три држави-членки на ЕУ се против кандидатски статус за Украина.
Во последниве недели, некои лидери, вклучително и францускиот претседател Емануел Макрон, сугерираа дека би било покорисно да и се даде на Украина некој вид привремен статус што ги зајакнува нејзините односи со ЕУ. Макрон рече дека дури и ако Украина биде признаена како земја кандидат, ќе биде потребно повеќе од една деценија според постоечките процедури за Украина да се приклучи на блокот.
Молдавија и Грузија, исто така, аплицираа за кандидатски статус, а официјалните лица велат дека генерално има поддршка за Молдавија, каде што сега има цврста про-ЕУ влада, но дека помала е увереноста за Грузија, која се соочува со политички превирања и забележително демократско назадување во последните години.
„Во дискусиите за кандидатскиот статус за Украина, Молдавија и Грузија, многу претставници и дипломати на ЕУ ја забележаа чувствителноста со оглед на бавното темпо на пристапување на земјите од Западен Балкан, вклучително и Северна Македонија, која беше прогласена за земја кандидат во 2005 година, Црна Гора, која доби статус во 2008 година и Србија и Албанија, кои беа признати како кандидати во 2009 г.“,
пишува Политико.