Зборувајќи за Русија, заменик-генералната секретарка на НАТО рече оти земјата претставува јасна и непосредна опасност и главна закана за евроатлантската безбедност, што се потврди со инвазијата врз Украина
Алијансата не сака да биде агресивна сила, туку силна и подготвена за одбрана од закани како Русија и тероризмот, рече заменик-генералната секретарка на НАТО алијансата, Радмила Шекеринска, во нејзиното излагање на панелот „Зајакнување на европските одбранбени капацитети – предизвици и можности“ на форумот во Дубровник, Хрватска.
Таа рече дека поголемите вложувања во одбраната се најдобар начин за одвраќање од потенцијална агресија, а говорејќи за Русија, рече оти земјата е јасна и непосредна опасност и главна закана за евроатлантската безбедност, што го потврди и инвазијата врз Украина, прво во 2014, а потоа и во 2022 година и затоа не смее да се биде ниту наивен ниту, пак, земјите членки на НАТО да се опуштат.
„Нашата цел е НАТО да биде посилен, поправеден и поефикасен, не за да се закануваме, туку за да одвратиме секоја потенцијална закана“,
кажа Шекеринска.
Откако на самитот на НАТО во Хаг минатиот месец, земјите членки се обврзаа да ги зголемат буџетите за одбрана на 5 отсто од БДП до 2035 година, Шекеринска сега оваа одлука ја нарече историска и оти таа мора да се имплементира со развој на одбранбената индустрија и поддршка за Украина. Дополнително, рече дека соработката помеѓу НАТО и Европската Унија е клучна, најмногу во поглед на заштитата на киберпросторот, критичната подморска инфраструктруа и развојот на европската одбранбена индустрија.
„Ако сакаме да покажеме единство и солидарност, сите мора да ги исполнат своите обврски“,
заклучи Шекеринска.
На форумот присутни се и шест члена на американскиот конгрес, а конгресменот Мајкл Тарнер рече дека САД нема да се повлече од Европа, а во однос на барањата на американскиот претседател Доналд Трамп, земјите да ја зголемат потрошувачката за одбрана, тој рече дека тоа не е само американски став и оти агресијата на Путин го натерала светот да инвестира повеќе во безбедноста.
„Ова е јасна порака за нашата посветеност на НАТО, на Хрватска, на Балканот. Ние не си одиме никаде“,
кажа Тарнер.
Тарнер воедно изрази и уверување дека САД ќе останат покрај Украина во војната со Русија и оти ќе продолжат да инвестираат во ракетни системи, дронови и конвенционална војска.