Подваријантата BA.2 позната како стелт е потврдена по секвенционирање на 41 примерок од пациенти позитивни на ковид-19
Три лица се заразени со новата подваријанта на омикрон позната како стелт од кои две се од Скопје, а едно од Струмица, информираа за МИА од Министерството за здравство согласно податоците од лабораторијата за вирусологија и молекуларна дијагностика при Институт за јавно здравје (ИЈЗ).
Откривањето на подваријантата доаѓа откако беше извршено секвенционирање на 41 примерок од лица позитивни на коронавирусот. Биле секвенционирани: 13 случаи од Скопје, Тетово – 4, Гевгелија – 4, Велес – 3, Кочани – 3, Свети Николе – 3, Неготино-2, Кавадарци – 2, како и примерок од: Охрид, Струга, Куманово, Струмица, Гостивар, Валандово и Виница.
Кај 35 примероци беше докажана BA.1 сублинијата на омикрон, а кај три примероци беше докажана BA.2 сублинијата на омикрон – позната уште и како „стелт“ – два се од Скопје и еден од Струмица.
Во државава сè уште циркулира и делта варијантата (B.1.617.2), докажана кај три примероци од кои двајца од Гевгелија, а еден од Велес. Кај два примерока е потврдено присуството на Influenza H3N2 (сезонски грип).