За четворица обвинети јавниот обвинител бара да биде продолжена мерката притвор, додека за петтата обвинета на сила се претходно определени мерки на претпазливост
Основното јавно обвинителство Штип поднесе обвинение за петмина турски државјани инволвирани во убиството на Енес Оздемир од Турција во мај годинава.
Оздемир беше застрелан со пиштол во кафуле на плоштадот во Штип, по што сторителот бил потпомогнат да побегне со возило. Полицијата го фати убиецот во близина на наплатната рампа Миладиновци, а уапси и други четири лица.
„Еден од обвинетите се товари за директно извршување на кривичното дело – Убиство од член 123 став 1, како и за неовластено држење на оружјето со кое било извршено убиството согласно член 396 став 1 од Кривичниот законик. Тројца од обвинетите му помогнале да го изврши кривичното дело и ќе одговараат за убиство во врска со членот 24, додека една обвинета се товари за помагање на сторителот по извршување на тешкото кривично дело според член 365 став 2 во врска со став 1 од Кривичниот законик“,
соопшти денеска Обвинителството.
Од Обвинителството велат дека првообвинетиот турски државјанин има 21 година и во земјава бил без регулиран престој. На почетокот на мај, тој неовластено го купил и пиштолот марка „FEG“ , калибар 9 мм, со избришани податоци за модел и сериски број.
Преку мобилни апликации се договорил со оштетениот на 8 мај да се сретнат во кафе бар, седнале и разговарале околу 15 минути. Во еден момент обвинетиот отишол до тоалетот и веднаш се вратил, го извадил пиштолот и започнал да пука кон оштетениот, нанесувајќи му шест огнострелни повреди од кои починал.
„Тројца обвинети, иако знаеле и биле свесни за неговите намери да го лиши од живот оштетениот, му обезбедиле логистичка поддршка за извршување на делото. Кога првообвинетиот пристигнал во Скопје, на 30.04 му обезбедиле сместување во станот кој и тие го користеле подолг временски период претходно, а му помогнале и преку засега непознати лица да го набави пиштолот. На денот на убиството, со возило на еден од обвинетите, заедно го превезле до Штип. По извршување на убиството, со цел да не бидат откриени, ја повикале и петтата обвинета“,
велат од Обвинителство.
Петтообвинетата пак, била повикана да ги превезе сите четворица од Штип во Скопје. Таа го запрела возилото на 300 метри од наплатната рампа Миладоновци, веднаш откако таму забележала дека има полиција, овозможувајќи му на убиецот да излезе и да почне да бега надвор од коловозот, покрај автопатот, каде подоцна бил пронајден и уапсен.
Останатите продолжиле да се движат со возилото кон патарината. Нив ги запрела полицијата која ги легитимирала и почнала да врши преглед над возилото. Иако и тие се обиделе да се дадат во бегство, за кратко време биле фатени.
За четворица обвинети јавниот обвинител бара да биде продолжена мерката притвор, додека за петтата обвинета на сила се претходно определени мерки на претпазливост.