Обвинението против 50-годишникот се однесува на кривичното дело предизвикување општа опасност бидејќи, како што наведуваат од ОЈО Скопје, му го давал возилото „пежо 207“ на својот син иако знаел дека тој не смее да вози бидејќи нема возачка дозвола и е повеќекратен сторител на сообраќајни прекршоци
Основното јавно обвинителство (ОЈО) Скопје поднесе обвинение против таткото на Васил Јованов – момчето кое на 29 јануари годинава ја прегази младата Фросина Кулакова на булеварот „Партизански одреди“ во Скопје.
Обвинението против 50-годишникот се однесува на кривичното дело предизвикување општа опасност бидејќи, како што наведуваат од ОЈО Скопје, му го давал возилото „пежо 207“ на својот син иако знаел дека тој не смее да вози зашто нема возачка дозвола и е повеќекратен сторител на сообраќајни прекршоци и тоа:
„Сообраќајна несреќа со полесни последици во ноември 2022 година, 11 сообраќајни прекршоци (возење без возачка дозвола, возење под дејство на алкохол, непочитување на семафор и на пешачки премин) во текот на 2023 и 2024 година, како и кривично дело сообраќајна несреќа со смртни последици на 29.01.2025 година“,
се наведува во соопштението на ОЈО Скопје.
Оттаму додаваат дека според обезбедените докази, обвинетиот во период од 4 ноември 2022 до 30 јануари 2025 година со општоопасно дејствие предизвикал опасност за животот и телото на луѓето, свесен дека поради неговите дејствија можат да настапат штетни последици, а сепак лекомислено сметал дека тие нема да настапат.
Скопското обвинителство минатата недела поднесе обвинение и против Васил Јованов, возачот кој ја прегази Фросина. Тој се товари за тешки дела против безбедноста на луѓето и имотот во сообраќајот.