Во понеделникот, поранешниот претседател беше ставен во домашен притвор по наредба на судијата на Врховниот суд, Алишандри де Мораис, поради кршење на ограничувањата што ги наметна судот во случај на заговор за државен удар во 2022 година
Десничарските пратеници и сенатори ги окупираа говорниците во двата дома на бразилскиот Конгрес во знак на протест против домашниот притвор што му беше наметнат на поранешниот претседател Жаир Болсонаро, објави ДПА.
„Нема да заминеме додека претседателите на двата дома не се состанат за да го решат прашањето за националниот суверенитет“,
рече Состенис Кавалканте, лидер на парламентарната група на крајно десничарската Либерална партија на Болсонаро.
Во понеделникот, поранешниот претседател беше ставен во домашен притвор по наредба на судијата на Врховниот суд, Алишандри де Мораис, поради кршење на ограничувањата што ги наметна судот во случај на заговор за државен удар во 2022 година.
Блокадата, организирана од неговите поддржувачи во Конгресот, започна доцна во вторникот и продолжи вчера, при што пратениците наизменично ги блокираа местата што обично се резервирани за парламентарните лидери. На некои од нив им беа залепени устите како симболично обвинение против опозицијата.
Политичарите повикуваат на гласање за импичмент против Мораис, како и амнестија за оние што упаднаа во владини згради во јануари 2023 година. Додека тоа не се случи, тие планираат да ги блокираат сите гласања во Конгресот.
Откако Болсонаро беше поразен на изборите во Бразил во 2022 година од неговиот левичарски ривал Луиз Инасио Лула да Силва, неговите поддржувачи, кои одбија да ја прифатат победата на Лула, на 8 јануари 2023 година упаднаа во Конгресот, Врховниот суд и претседателската палата во главниот град Бразилија, предизвикувајќи значителна штета. Болсонаро ги негираше сите обвиненија за обид за државен удар.
Претседателот на Домот на пратеници, Уго Мота, ја откажа пленарната седница во вторникот и за вчера најави состанок на лидерите на парламентарните групи.
„Конгресот мора да биде мост за дијалог“,
напиша тој на платформата Икс.
Претседателот на Сенатот, Дави Алколумбре, исто така, го критикуваше протестот велејќи дека дејствијата се спротивни на демократските принципи.