Предвидено е и претседателката Сиљановска-Давкова да има свое обраќање и да оствари билатерални средби со дел од учесниците, соопштија од нејзиниот кабинет
Во Швајцарија денеска почнува дводневна мировна конференција за Украина на која ќе учествуваат високи претставници на околу сто земји и на меѓународни организации. Ова е еден од најамбициозните обиди да се направи мировен план за Украина и да се притисне Русија да ја заврши војната.
Конференцијата се одржува на иницијатива на Украина, а ќе учествува и украинскиот претседател Володимир Зеленски. Целта е да се мобилизира меѓународна поддршка за Украина.
На Самитот ќе присуствува и претседателката Гордана Сиљановска-Давкова, соопштија од нејзиниот кабинет.
„Предвидено е претседателката Сиљановска Давкова да има свое обраќање на самитот и да оствари билатерални средби со дел од учесниците“,
соопштија оттаму.
Кремљ соопшти дека средбата би била залудна без руски претставник. Во пресрет на мировната конференцијa, на која Русија не е поканета, Путин вчера наведе низа услови за прекин на огнот, кои се во целосна спротивност со условите поставени од Украина.
Во третата година од војната, Русија контролира речиси една петтина од територијата на Украина. Украина вели дека мирот може да се заснова само на целосно повлекување на руските сили и обновување на територијалниот интегритет на Украина.