Првиот круг од изборите ќе се одржи на 17 октомври, а во општините каде што ќе има и втор круг ќе се гласа на 31 октомври. На овие избори право глас имаат 1 824 864 граѓани
Денеска почнува изборната кампања за локалните избори закажани за 17 октомври. Таа ќе трае 20 дена, односно до 15 октомври на полноќ. Во општините каде што ќе има втор круг, пак, ќе се гласа на 31 октомври.
На изборите ќе учествуваат 301 кандидат за градоначалник и 576 листи за советници. Најголемите партии и коалиции официјалната кампања денеска ја почнуваат речиси традиционално од истите градови како и на минатите избори.
Коалицијата на СДСМ, „Најдоброто за нашата општина“, денешниот централен настан ќе го има во Битола, а претходно нејзиниот карван ќе биде во Демир Хисар. ВМРО-ДПМНЕ, пак, почнува со собир во Античкиот театар во Охрид, а во текот на денот на прес-конференција својата програма ќе ја претстави и кандидатката за градоначалничка на Скопје, Данела Арсовска, која се кандидираше како независна, но потоа ја доби поддршката од опозициската партија.
ДУИ најави дека кампањата ќе ја почне и ќе ја заврши во Гостивар. Беса, пак, започнува во Скопје со собир вечерва на отворено кај спортскиот центар „Борис Трајковски“.
На овие избори право на глас имаат 1 824 864 граѓани. Избирачкиот список беше заклучен на седница на ДИК, а најдоцна на 1 октомври, односно 15 дена пред денот на одржувањето на изборите, ДИК треба да го потпише заклучениот Избирачки список и изводите од него. Од вкупниот број гласачи, во изводите на Избирачкиот список се запишани 1 740 147. Во посебните изводи од Избирачкиот список се запишани 82 461 лица, кои се на привремена работа или престој во странство, согласно евиденцијата на надлежниот орган, 1 899 гласачи кои на денот на изборите се на издржување казна затвор или се во притвор, 351 лице во установи за вонсемејно сместување и шест гласачи кои, согласно евиденцијата на Министерството за труд и социјална политика, се запишани како раселени лица.