Вкупната вредност на проектот е околу 3,7 милијарди денари или 60 милиони евра, кои се обезбедени со поддршка од од Европската инвестициска банка, со Европската банка за обнова и Европската Унија
Почнува изградбата на гасниот интерконектор со Грција во должина од 66,7 километри на потегот од Гевгелија до Неготино, со почетен капацитет од 1,5 милијарди кубни метри годишно.
Премиерот Христијан Мицкоски денеска на настанот што се одржа во близина на патниот правец Неготино кон Демир Капија, со што се означи стартот на градежните работи рече дека овој интерконектор ќе донесе нови извори на природен гас, стабилно снабдување за индустријата и домаќинствата, пониски цени за граѓаните, поголема конкурентност за компаниите и силна порака дека конечно државата станува дел од европската енергетска мрежа.
„Се поврзуваме со гасоводите на соседите, што ќе не направи регионална енергетска крстосница, што ќе значи повеќе избори, повеќе стабилност и пониски трошоци, а државава повеќе нема да биде на крајот од мрежата, туку во срцето на регионалниот енергетски тек“,
рече Мицкоски на стартот на изградбата на гасниот интерконектор со Грција.
Овој проект, според него, не е нова идеја, но досега остана само како идеја.
„Иако беше ветуван претходно никогаш не беше започнат. Затоа, денес не правиме спектакл за да ги залажеме луѓето, туку да покажеме дека кога се работи со одговорност, истрајност и вистински намери, резултатите стигнуваат. И ова е само дел од големата слика. Се поврзуваме со гасоводите со соседите, што ќе не направи регионална енергетска крстосница“,
вели тој.
Вкупната вредност на проектот е околу 3,7 милијарди денари или 60 милиони евра, обезбедени со поддршка од од Европската инвестициска банка, со Европската банка за обнова и Европската Унија.
На настанот присуствуваше и амбасадорката на Соединетите Американски Држави (САД)н во земјава, Анџела Агелер, која посочи дека изградбата на интерконекторот е долгоочекуван проект, кој демонстрира независност и ги зајакнува врските во однос на енергијата и економскиот развој.
„Стратешка инвестиција во безбедноста, просперитет и суверенитетот. Важно е да се направи енергетска диверзификација. Важна е регионалната соработка, партнерството. Како најголем производител на ЛНГ (течен природен гас), САД сака наскоро нашиот гас да се пренесува преку овој гасовод. Сакаме ода видиме економска сигурност и безбедност и развој што тој проток ќе ги донесе за сите нас. Партнерствата со пријателите и соседите се докажува дека се многу повеќе од бирократски и политички маневри“,
кажа Агелер.
Амбасадорот на Европската Унија, Михалис Рокас, рече дека оваа клучна инфраструктура, ќе придонесе за приближување до трите цели на Европската Унија – безбедност, одржливост и конкурентност.
Вицепремиерот и министер за животна средина, Изет Меџити, посочи дека гасниот интерконектор со Грција не е само инфраструктурен проект, туку јасна порака дека државата знае каде оди, со кого се поврзува и каква иднина гради.
Изведувачот на работите, кумановската компанија „Рапид билд“ треба да ги заврши работите за 22 месеца, односно интерконекторот да биде готов во 2027 година.
Од грчка страна интерконекторот е со должина од 123 километри и е речиси готов.