„Херкул“, веб-страница која ги објавува проповедите на Ѓулен, на својот профил на Икс објави дека Ѓулен починал во неделата вечерта во американска болница каде што се лекувал
На 83-годишна возраст почина Фетулах Ѓулен, турскиот муслимански проповедник за кој Анкара тврдеше дека го организирал неуспешниот пуч против турскиот лидер Реџеп Таип Ердоган во 2016 година, објавија денеска турски медиуми.
„Херкул“, веб-страница која ги објавува проповедите на Ѓулен, на својот профил на Икс објави дека Ѓулен починал во неделата вечерта во американска болница каде што се лекувал.
— Herkul (@Herkul_Nagme) October 21, 2024
Ѓулен беше некогашен сојузник на Ердоган, но тие се разделија. Нивните односи се променија во декември 2013 година кога на виделина излегоа истраги за корупција насочени кон министри и функционери блиски до Ердоган.
Ердоган го сметаше за одговорен за обидот за државен удар во 2016 година, во кој одметнати војници управуваа со воени авиони, тенкови и хеликоптери. Околу 250 луѓе беа убиени во обидот да ја преземат власта.
По Ѓулен беше издаден налог за апсење во 2014 година, а неговото движење, две години подоцна, беше означено како терористичка група.
Набргу по пучот во 2016 година, Ердоган ја опиша мрежата на Ѓулен како предавници и ветуваше дека ќе ги искорени каде и да се. Стотици училишта, компании, медиуми и здруженија поврзани со него беа затворени, а имаше и запленети имоти.
Ѓулен, кој живееше во самонаметнат егзил во САД од 1999 година, негираше вмешаност во пучот.
Во 2020 година, за само еден ден, властите на Турција уапсија 198 лица, меѓу кои голем број припадници на војската, под сомнение дека биле блиски со проповедникот Фетулах Ѓулен.
Апсењата се извршени по наредба на канцеларијата на обвинителот на Измир, кој издаде налози за апсење на 304 лица, осомничени за телефонски разговори со водачите на движењето Ѓулен. Меѓу осомничените, 295 работат во воена служба, пренесува Анадолија.