Според пишувањата на одредени медиуми, мајката на бебето минатата година неколку месеци се лекувала од туберкулоза на Институтот за белодробни заболувања, но потоа воопшто не дошла на контрола ниту, пак, побарала помош за своето болно дете
Почина деветмесечното бебе, кое на 24 февруари од Куманово беше донесено во скопската Детска клиника во тешка состојба. По приемот на клиниката, каде што беше префрлено од болницата во Козле, беше приклучено на механичка вентилација. Бебето беше примено со белодробна слабост, по што се утврди дека ја има заразната болест туберкулоза.
Според пишувањата на одредени медиуми, мајката на бебето минатата година неколку месеци се лекувала од туберкулоза на Институтот за белодробни заболувања, но потоа воопшто не дошла на контрола ниту, пак, побарала помош за своето болно дете. Откако се откри дека бебето боледува од туберкулоза, неговата мајка повторно беше хоспитализирана во Институтот, а нејзините три други малолетни деца беа повикани во болницата во Козле за да им се направат епидемиолошки испитувања за да се утврди дали и тие имаат туберкулоза.
Потоа, од Институтот во Козле информираа дека според првичните тестирања и другите четворица членови на семејството се инфицирани од туберкулоза, но, како што рекоа оттаму, тоа не значи дека се болни зашто се во добра здравствена состојба.
„Овој позитивен тест не значи дека се болни, значи дека се инфицирани, а понатаму од другите анализи зависи дали овие деца ќе бидат ставени на заштитна терапија за да не развие активна болест или ќе ги лекуваме како болест на туберкулоза“,
изјави раководителката на Одделот за туберкулоза во ЈЗУ Институт „Козле“, д-р Катерина Бошковска.
Здравствените власти изразија чудење зошто бебето не било внесено во здравствениот систем, зошто немало податоци каде и како се лекувало и зошто семејството воопшто не било евидентирано како социјален случај. Директорката на Детската клиника, Стојка Нацева Фуштиќ, во изјава за медиумите пред неколку дена кажа дека нема потреба од паника за зараза бидејќи сега веќе починатото бебе веднаш по приемот било изолирано и за него се грижел посебен медицински персонал.
Секој заболен со активна форма на болеста, ако не се лекува, може да зарази 10-15 лица. Таа се нарекува и болест на сиромашните и најчесто се заразуваат млади лица во продуктивниот период на животот.