Министерот Азир Алиу рече оти е потребен вонреден надзор бидејќи мора да имаат податоци за да видат дали тие индиции се точни и ако се точни, што би се презело понатаму
По јавните тврдења на професорот Сашко Кедев оти во земјава се прават непотребни кардиолошки интервенции, министерот за здравство Азир Алиу вели дека е формирана интерна комисија, а дополнително ќе се направи и независен стручен надзор со тројца експерти од европските земји, но не од соседството, чиј извештај ќе биде јавно достапен и ќе претставува основа за евентуални законски измени или воведување нови протоколи.
„Заклучивме како Министерство за здравство да направиме комисија за стручен надзор што ќе се состои од експерти од странство. Кога велиме експерти од странство, сакав таа комисија да биде навистина независна и тој извештај од таа независна комисија да ни е патоказ за понатаму, ако има такви индиции – се потврдуваат истите, да може да се отстранат“,
рече Алиу.
Министерот вели дека е потребен вонреден надзор бидејќи „мора да имаме податоци да видиме дали тие индиции се точни и ако се точни, што понатаму“, а контроли ќе се прават, како што рече тој, според индикациите, при што ќе се почне од приватните здравствени институции, но, исто така, ќе се продолжи и во јавните здравствени институции што се занимаваат со истата проблематика.
Тој вели оти министерството веќе располага со база на податоци за сите кардиолошки интервенции од 2019 до 2025 година. Според бројките за оваа година, во Охрид се направени 493 интервенции, во Државна кардиохирургија 105, на Клиниката за кардиологија 1 488, во „Аџибадем Систина“ 531, а во „Жан Митрев“ 939. Дополнително, посочи дека државата сега нема информации за пациенти кои не се покриени од Фондот, и дека обврската на приватните институции да ги отворат базите ќе овозможи целосна слика за здравствените третмани во земјава.
Алиу кажа и дека ќе оствари средба со д-р Кедев и оти нема да брзаат со целата постапка бидејќи согласно нивните внатрешни анализи немаат индиции за такви случаи кои се архивирани или, пак, податоци кои се јасно читливи.
Министерот вели оти од наредниот месец,приватните здравствени установи ќе бидат обврзани да ги отворат базите со информации, со цел Министерството за здравство да ги агрегира сите податоци за пациентите.
„Веќе работи комисија кај нас, ако има законски пречки, да се отстранат веднаш, наредната недела и ќе пуштиме писмо до сите приватни здравствени институции од 15-ти наредниот месец да мора задолжително да ги отворат базите за да може ние да ги агрегираме сите постоечки информации што се таму во нивните институции. Ова е право на државата. Бидејќи секој граѓанин директно или индиректно придонесува кон здравствениот систем во државата и кон Фондот и затоа ние мора да бидеме во тек со здравствената патека на секој граѓанин на нашата Република“,
кажа тој.
Претходно денеска, Фондот за здравствено осигурување информира дека врши редовни контроли на спроведувањето на договорните обврски со јавните и со приватните здравствени установи, со цел да обезбеди здравствените услуги да се изведуваат во согласност со законските прописи и склучените договори и оти во сите установи, како што посочуваат, се вршат редовни годишни контроли, а Фондот постапува и по поднесени претставки на пациенти или по сопствен наод. Во изминатите четири години, велат, не се евидентирани претставки за непотребни медицински интервенции