„Во моментов ние немаме ништо во Деловникот – ниту начин на гласање, ниту дали првиот што ќе добие осум гласа е избран за да биде кандидат, ниту дали треба сите да се гласаат, сите што се кандидати. Единствено во Деловникот сме предвиделе дека најмалку еден член со поддршка од уште тројца други членови може да предложи кого било од судиите во државава што ги исполнува условите што ги бара Законот за судски совет, а ниту самиот закон воопшто има предвидено нешто за таа процедура“, вели претседателот на Судскиот совет, Александар Камбовски
Потребни се итни измени на Деловникот за работа на Судскиот совет со кои ќе се уреди начинот како се утврдува предлог за уставен судија, вели претседателот на Судскиот совет, Александар Камбовски, во интервју за „360 степени“ на МРТ 1. По случајот со Елизабета Дуковска, чиј избор за уставна судијка го поништи Управниот суд утврдувајќи пропусти во постапката на утврдување кандидат од Судскиот совет, Камбовски вели дека ова тело не треба да носи избрзани одлуки.
„Во моментов ние немаме ништо во Деловникот – ниту начин на гласање, ниту дали првиот што ќе добие осум гласа е избран за да биде кандидат, ниту дали треба сите да се гласаат, сите што се кандидати. Единствено во Деловникот сме предвиделе дека најмалку еден член со поддршка од уште тројца други членови може да предложи кого било од судиите во државава што ги исполнува условите што ги бара Законот за судски совет, а ниту самиот закон воопшто има предвидено нешто за таа процедура. Ако избрзаме повторно, без претходно ова да го решиме, без да предвидиме јасна процедура, на кој начин се доаѓа до предлогот за кој да биде судија на Уставниот суд, мислам дека не треба да брзаме“,
вели Камбовски.
На прашањето како ќе постапат и дали ќе достават нов предлог за уставен судија, Камбовски вели дека за таква одлука ќе треба да се изјаснат сите членови на Советот.
„Ние сме 13 луѓе, ние сме колективно тело, мора еднаш да се собереме сите заедно и да заземеме став. Не сакам да избрзувам со мои мислења и мои ставови затоа што оваа е ситуација која никогаш, ни во поблиска ни во подалечна историја, не се сеќавам да сме ја имале“,
додава Камбовски.
Во однос на начинот на кој тој како претседател на Судскиот совет експресно го информираше Апелацискиот суд дека Дуковска се враќа таму на работа, наспроти претходното решение кога со гласање било утврдено дека нејзината позиција се става во мирување, Камбовски вели дека сега имало специфична ситуација.
Камбовски: Колешката беше одјавена од Уставниот суд. Таа се обрати до нас и ние, нормално, го известуваме судот од каде што доаѓа дека има право да се врати.
360°: Вие како претседател, а не Судскиот совет?
Камбовски: Во јуни повеќето од колегите користат годишни одмори и имав консултации, направив колегиуми со колегите на кој начин да го направиме тоа и од тие што беа присутни сите се согласивме дека доволно е едно известување да пратиме до претседателката (на скопска апелација, н.з.), а на прва наредна седница што ќе ја имаме, тоа да го констатираме и да го кажеме да слушне јавноста.
За евентуално отпочнување постапка за утврдување одговорност на судиите кои постапувале во овој предмет во Управниот и Вишиот управен суд, по барањето што ги поднесе судијката Елизабета Дуковска, претседателот на Судскиот совет вели дека се постапува.
Камбовски: По пат на ждребување се формираат комисии и тие комисии постапуваат по барањето. Меѓутоа, на самиот почеток се, на претходно испитување на тие барања, дали ќе се продолжи понатаму или не.
360°: Во какви рокови треба да се очекува одлуката?
Камбовски: Ние имаме јасни рокови, би требало брзо да биде, но проблем е што доаѓа лето, доаѓа судска ферија, но мислам дека во брз рок ќе го завршат тоа колегите. Првично се оди на испитување на барањето и доколку комисијата смета дека нема основ да го отфрли како неосновано, тогаш се оди во наредна фаза.
