Најавите за измените на Законот за јавен ред и мир денеска ги соопшти пратеникот од редовите на владејачката партија ВМРО-ДПМНЕ, Тони Јаревски
Владејачкото мнозинство најавува измени на Законот за јавен ред и мир со кои би требало да се регулира употребата на пиротехнички средства во затворен простор по скратена постапка, најави пратеникот Тони Јаревски на денешната прес-конференција од партиското седиште. Тој вели дека изминатата недела работеле посветено на изнаоѓање на адекватни решенија со кои би требало во иднина да се избегнат нови трагедии или хаварии како онаа во клубот „Пулс“ во Кочани, каде животот го загубија 59 лица. Токму за оваа цел, Јаревски најави дека законот ќе се менува по скратена постапка и ќе создаде нови механизми за воведување ред, зашитета и поголема безбедност.
„Предлог законот го стеснува обрачот околу оние кои создаваат ризици преку злоупотреба и незаконско користење на пиротехнички средства, особено во затворен простор. Се заострува регулацијата за приредување огномет, факелијада и слични приредби на кои се користат експлозивни материи“,
рече Јаревски.
Дополнително, вели дека се предвидува и заострување на казните за правните и физичките лица кои ќе ги прекршат одредбите од овој закон, односно одреден дел од казните ќе бидат двојно повисоки, а за други, законот ќе предвидува и кривично гонење. Преку ова законско решение ќе се прошири и надлежноста на полицијата со кој ќе се овозможи поголема контрола при користење на експлозиви и пиротехнички средства.
„Ова е само едно од законските решенија со кои ќе направиме значајни подобрувања за зголемена безбедност. Во периодот кој следи, во Собранието ќе се поднесат и други предлози кои се подготвуваа изминативе две недели. Ги повикувам сите мои колеги пратеници, без разлика на политичката припадност, да го поддржат овој предлог-закон, бидејќи станува збор за суштинска промена која не засега сите“,
изјави пратеникот од ВМРО-ДПМНЕ.