Министерот за здравство очекува неделава да ги потпише договорите со странските експерти кои потоа со домашната комисија, на две до три работни сесии, ќе стигнат до финален извештај
По конечниот извештај за случаите со непотребно упатување на операција и непотребно спроведени операции на срце, Министерството за здравство ќе се консултира со правници за следните чекори поврзани со евентуална одговорност и санкции. Ова го кажа министерот Азир Алиу во интервју за „360 степени“ на МРТ 1.
„360 степени“: Што ќе бидат потенцијалните последици, санкции, казни, евентуални процеси, кога финално ќе се утврди дека има пропусти, грешки?
Алиу: За нас како Министерство, тоа ќе ни биде патоказ за креирање или на нов закон или менување на членови од законот за да може да бидеме уште еднаш робусни кон ваков тип „интерапти“, процеси од надвор. За понатаму, нормално, ако има наод којшто треба да се проследи кон други институции, ние сме законски задолжени тоа да го направиме и ќе го направиме.
„360 степени“: Оти ако некој некому отворил срце, а не требало да му го отвори, да го оперира, тоа не е мала работа. Страшно звучи.
Алиу: Ние ќе ги проследиме до надлежните институции ако имаме таков случај. Ако овие десет завршат и во крајниот извештај, ќе мора да видиме со правниците кои се следните чекори.
Министерот за здравство го очекува финалниот извештај за кратко време откако ќе ги потпишат договорите со странските експерти.
„Знаете, кога сте во предизборие и во изборниот период, вие законски не можете да потпишувате никаков договор којшто има финансиски импликации. Не ги потпишав. Сега се во фаза на потпишување. Се надевам дека ќе бидат потпишани во текот на неделата“,
рече Азир Алиу.
Според него, на комисијата ќе ѝ бидат потребни две до три работни сесии или не повеќе од три недели за да дојде до конечен извештај.
На прашањето зошто државната кардиохирургија не е толку конкурентна споредено со другите две приватни болници во коишто се прават кардиохируршки интервенции, Алиу вели дека тоа е така зашто здравствениот систем во државава се менаџира ад хок и без национална стратегија.
„Едноставно, ние само решаваме проблеми, не вршиме едукација, не правиме анализа на инфраструктура што ни е потребна и тука е главниот проблем за секоја здравствена институција. Затоа, сега веќе правиме национална стратегија за човечки ресурси, заедно со Министерство за образование, веќе има работна група. Нашето министерство е задолжено да информира колку човечки капацитети имаме во моментов и каков тип перформанси, профили ќе ни бидат потребни 10 години отсега, за да може Министерството за образование потоа да креира нови курикулуми, нови работни, слободни места за студенти и средно стручен кадар. Бидејќи, знаете, доктор да профилирате, вам ви требаат шест години. Ќе знаеме за секоја година каков тип професионалци имаме од образовниот систем“,
вели Алиу.