„Во минатото, учениците од ромската заедница имаа на располагање учебници по овој предмет само од трето до петто одделение, што претставуваше ограничување во континуитетот на изучување на сопствениот јазик и култура. Со новиот учебник за шесто одделение, по првпат се обезбедува надградба на наставниот процес“, велат од МОН и додаваат дека е во тек и постапка за изработка на учебник за седмо одделение
По првпат е обезбеден учебник по изборниот предмет „Јазик и култура на Ромите“ за шесто одделение – објави денеска Министерството за образование и наука по повод Денот на Ромите.
Од МОН велат дека ваквиот потег е значаен исчекор во унапредувањето на образованието на ромската заедница, а доаѓа по измените во Законот за учебници во основното и во средното образование со кои, како што додаваат од Министерството, се создадени услови за проширување на наставните материјали и за повисоките одделенија.
„Во минатото, учениците од ромската заедница имаа на располагање учебници по овој предмет само од трето до петто одделение, што претставуваше ограничување во континуитетот на изучување на сопствениот јазик и култура. Со новиот учебник за шесто одделение, чиј автор е Даниел Петровски, по првпат се обезбедува надградба на наставниот процес. Во тек е и постапка за изработка на учебник за седмо одделение“,
велат од Министерството за образование.
Оттаму посочија дека е донесен и Правилник за начинот на формирање групи помали од 15 ученици од исто одделение, за да се овозможи изучување на јазикот и културата на заедниците и кога бројот на ученици е помал.
Според податоците на МОН, изборниот предмет „Јазик и култура на Ромите“ во моментов го изучуваат над 2 300 ученици Роми, кои се распределени во 13 основни училишта во седум општини низ државата.