По речиси две и пол години, скопското обвинителство поднесе обвинителен акт за убиството на Мартин Јанушев, кој на 3 ноември 2017 година беше застрелан во населбата Аеродром.
Според обвинението, 28-годишниот Филип Секуловски, познат како Кобра, со умисла го лишил од живот Јанушев. На денот на убиството излегол на викенд од затворот во Скопје каде што издржувал казна затвор за трговија со дрога и се упатил пред зградата каде што живеел Јанушев.
„Откако се сретнал со жртвата пред влезот на зградата, испукал кон него повеќе проектили од огнено оружје марка „црвена застава М70“ со калибар 7,65 мм, нанесувајќи му пет огнострелни повреди – прострелни рани. Од здобиените повреди дошло до прекин на работата на витално важните органи и до смртен исход кај сега покојниот Мартин Јанушев“,
велат од Основното јавно обвинителство – Скопје.
Веднаш по убиството, Секуловски избега и не беше достапен за полицијата, а истрага беше отворена во октомври 2018 година.
„По една година, на 14.10.2019 година, лицето беше лишено од слобода и за него почна да се спроведува веќе определената мерка притвор, која по барање на обвинителството е неколкупати продолжувана. Во рамки на сеопфатната истражна постапка, обвинителството обезбеди голем број материјални и вербални докази, релевантни вештачења и анализи, беа испитани и над 40 сведоци“,
стои во соопштението од скопското обвинителство.
Обвинителството бара и продолжување на мерката притвор бидејќи смета дека сè уште постои опасност од бегство на обвинетиот, како и опасност да ги сокрие трагите и да влијае врз сведоците.