Посетата на Холандија од страна на украинскиот претседател Володомир Зеленски доаѓа два дена откако САД ѝ даде зелено светло на Холандија да обезбеди американски борбени авиони од типот Ф-16 на Украина
Претседателот на Украина, Володомир Зеленски, денеска пристигна во Холандија, каде што треба да одржи средба со премиерот во оставка Марк Руте. Авионот со кој патувал Зеленски слетал во воздухопловна база во Ајндховен, а посетата на Холандија доаѓа откако земјата доби зелено светло од САД за да ѝ обезбеди ловци Ф-16 на Украина. Сепак, засега не се познати деталите за овие испораки, ниту датумот на кој би можеле да бидат извршени имајќи предвид дека украинските пилоти допрва треба да учат како се управува со ваков тип авиони.
„Авионите Ф-16 за Украина за заштита на нашиот народ од рускиот терор се главната цел на посетата“, додава Зеленски. Ќе станеме посилни“,
напиша Зеленски.
Од почетокот на руската агресија врз Украина, Киев бара западни авиони за да се спротивстави на силите на Москва, кои во моментов доминираат.
По информацијата дека Вашингтон одобрил испраќање на авиони Ф-16 во Украина од Данска и Холандија за одбрана од Русија, денеска министерот за одбрана на Украина, Олексеј Резников, кажа дека обуката за украинските пилоти кои треба да се обучат да управуваат со ваков тип авиони започна, но поради комплексноста и тежината, ќе трае најмалку шест месеци, а можеби и повеќе.
Тој рече дека детали околу тоа каде ќе се одржува обуката нема да се објават во јавноста и повика на трпеливост кај украинските граѓани. Во телевизиско интервју, тој кажа и дека шестмесечната обука се смета за минимум за пилотите, но сè уште не е познато колку долго ќе трае обуката на инженерите и механичарите. Украина сака софистицирани воени авиони од американско производство за да се спротивстави на воздушната супериорност на Русија, чии сили ја нападнаа земјата во февруари 2022 година.
„Затоа, за да изградите разумни очекувања, поставете си минимум шест месеци, но не разочарувајте се ако е подолго”,
изјави Резников за Канал 24.