Откако утрото една од протестните партии „Исправи се! Мафијата надвор! му ја откажа поддршката за предложениот владин кабинет, лидерот на „Има таков народ“, Слави Трифонов, влезе во директна конфронтација со втората партија произлезена од протестите против владата на Борисов, „Демократска Бугарија“.
Иако лидерот на „Демократска Бугарија“ Христо Иванов не го соопшти својот став во однос на можноста за соработка со партијата на Трифонов, тој вчера го критикуваше изборот на кандидати, особено на мандаторот укажувајќи дека составот му е чуден и му мириса „сарајот на Ахмед Доган“, контроверзниот поранешен лидер на партијата на Турците – ДПС, која се поврзува со сериозни корупциски скандали. Неговата десна рака, Ивајло Мирчев денеска рече дека предложениот кабинет му наликува на НДСВ 2 (Национално движење Симеон Втори- втор дел н.з.).
Трифонов во својот стил, обраќајќи се со пост на Фејсбук укажа дека тој не учествува во никакви заткулисни игри и не ги определува министрите ниту во нечија фарма, ниту во нечиј сарај а предложената влада не е ниту на Борисов, ниту на Доган.
„Ако Николај Василев им наликувал на НДСВ 2 (копија на владата на Саксобурготски и Доган од 2001 н.з.), што да се каже за Христо Иванов кој беше министер во владата на Борисов. Значи ли тоа дека ‘Демократска Бугарија’ е ГЕРБ 2? А Маја Манолова? Таа беше потпретседател на парламаментот од редовите на БСП. И, што тоа треба да значи, дека ‘Исправи се! Мафијата надвор!’ е БСП 2?“,
пишува лидерот на ИТН, Слави Трифонов.
На забелешките дека се обидува власта да ја преземе во свои раце и дека почнува да се однесува како суверен и диктатор, Трифонов вели дека предложените кандидати на „ИТН“ се гаранција дека тоа нема да се случи, бидејќи „власта ќе премине во рацете на образувани, подготвени и чесни луѓе, а контролата врз нив во целост ќе биде во рацете на парламентот.