Од девет предложени имиња, расправата досега е завршена само за двајца. Комисијата за прашања на изборите и именувањата треба да утврди тројца кандидати кои потоа ќе треба да бидат изгласани и на пленарна седница
Со недостаток од четири судии, Уставниот суд изминатиот период функционира само со петмина, односно е на работ од потребниот кворум за да може воопшто да одржува седници, а за многу поднесени иницијативи не можеше да одлучува бидејќи немаше потребно мнозинство
Откако заврши колективниот одмор на пратениците во Собранието, изборот на тројца нови уставни судии повторно се враќа на дневен ред.
За денеска е закажано ново продолжение на седницата на Комисијата за прашања на изборите и именувањата каде што во тек е расправата за предложените вкупно девет кандидати – три дојдоа како предлог на пратениците од владејачкото мнозинство, а шест од опозицијата.
Од деветемина, оваа собраниска комисија треба да утврди три предлози кои потоа ќе треба да бидат изгласани и на пленарна седница. Досега расправата заврши само за двајца кандидати: апелацискиот судија Фатмир Скендер, кој е предлог на власта и доби мнозинство гласови „за“ во Комисијата, и за професорката Родна Живковска, која е предлог на ВМРО-ДПМНЕ и која не ја доби поддршката од собраниското тело.
Расправата е застаната кај кандидатката Татјана Васиќ, предлог на власта, а потоа треба да се дебатира и за предлогот на СДСМ републичкиот обвинител Љубомир Јовески да стане уставен судија, како и за преостанатите пет предлози од опозицијата: пензионираниот професор Саво Климовски, шефот на Вишото обвинителство Штип, Тодор Витларов, охридскиот обвинител Воислав Димоски, управната судијка од Битола, Весна Јовановска и пензионираниот гостиварски судија Бранко Секулоски.
Тројцата уставни судии што треба да се изберат ќе ги пополнат местата на поранешните судии Сали Мурати, Елена Гошева и Никола Ивановски, чиј мандат истече уште на крајот на мај 2021 година.
Седницата за пополнување на испразнетите места официјално започна во јуни лани, но поради несогласувањата помеѓу власта и опозицијата, блокадите, локалните избори, а потоа и преструктурирањето на владејачкото мнозинство и промените во составот на Комисијата, речиси една година пратеници не успеаја да утврдат предлози.
Пратениците конечно ги предложија споменатите девет имиња и почнаа дебата за нив во мај годинава.
Покрај тројцата нови уставни судии кои треба да се изберат во оваа постапка, треба да се распише оглас за уште еден судија затоа што во меѓувреме (во јануари 2022 г.) и на Јован Јосифовски му заврши деветгодишниот мандат. Со недостиг од четири судии, Уставен изминатиот период функционира само со петмина односно е на работ од потребниот кворум за да може воопшто да одржува седници, а за многу поднесени иницијативи не можеше да одлучува бидејќи немаше потребно мнозинство.
Доколку во наредните два до три месеци Собранието не успее да избере нови судии, работата на Уставен би можела целосно да се закочи бидејќи во ноември годинава истекува деветгодишниот мандат и на судијката Вангелина Маркудова.