Она што можеме да го потврдиме е дека полицијата трага по непознатите сторители кои се странци, кои го врзале и го возеле во неговиот автомобил барајќи му 20.000 евра, се наведува во објавата на профилот на Кајмакоски
По ноќта помината во полициската станица, Кајмакоски е дома и во добра состојба, велат од ПР тимот на пејачот, кој ноќеска беше киднапиран во Белград. Во објавата споделена на Фејсбук профилот на Кајмакоски, се наведува дека информацијата за киднапирањето е точна и дека полицијата трага по напаѓачите.
„Она што можеме да го потврдиме е дека полицијата трага по непознатите сторители кои се странци, кои го врзале и го возеле во неговиот автомобил барајќи му 20.000 евра. Возеле накај Рума, кога сообраќајната полиција се обидела да ги запре. Возилото удрило во банкина, киднаперите излегле од автомобилот и избегале. Даниел потоа поминал неколку часа во полициска станица“,
се наведува во објавата.
Во објавата пишува и дека во интерес на истрагата, Кајмакоски нема да споделува дополнителни информации со јавноста.
Српските медиуми утрово објавија дека македонскиот пејач Даниел Кајмакоски бил киднапиран во Белград, по музички настап во ноќниот клуб „Лафајет“. Напаѓачите, како што се наведува во објавата, вооружени влегле во возилото на Кајмакоски, го врзале и продолжиле да се возат со него, барајќи откуп од 20 илјади евра.
Во снимка објавена на социјалните мрежи, дел од медиумите пренесуват дека имало полициска потера по возилото, кое бегајќи од полицијата удрило во заштитна ограда. Кајмакоски бил пронајден врзан во возилото, а двајцата напаѓачи успеале да избегаат. Полицијата трага по насилниците.