Поранешниот близок соработник на американскиот претседател Доналд Трамп објави анкета на својата социјална мрежа Икс на која доби поддршка од 80 отсто од корисниците за идејата за формирање нова политичка партија
На Соединетите Американски Држави ѝ е потребна партија која ќе претставува 80 отсто од луѓето кои не се екстремни поддржувачи ниту на левицата ниту на десницата од политичкиот спектар, напиша на социјалната мрежа Икс милијардерот и поранешен близок соработник на актуелниот американски претседател, Илон Маск.
Тој објави анкета на која осумдесет отсто од неговите 220 милиони следбеници се изјасниле дека се за формирање нова партија која би била со различна идеологија од Демократската и Републиканската партија.
„Тоа е судбина“,
напиша Маск на Икс.
Американскиот претседател Доналд Трамп пак, за Еј-би-си њуз изјави дека Маск го изгубил здравиот разум, а медиумот објави дека луѓе блиски до претседателот изјавиле оти тој бил повеќе потиштен отколку лут за неодамнешните случувања и отворената војна помеѓу двата поранешни блиски соработници.
Во меѓувреме, во интервју за Ал Арабија, таткото на Маск изјавил дека го контактирал својот син и го повикувал да го прекине „конфликтот“ со Трамп.
Растечкиот отпор меѓу американскиот претседател и Маск следува откако милијардерот остро го критикуваше законот за даноци и трошоци додавајќи дека законот ја поткопува работата на Одделот за владина ефикасност, кој тој до неодамна го водеше.
Трамп и Маск пред два дена имаа вербална расправија преку своите социјални платформи – Трамп на Трут соушл, а Маск на Икс.
Маск сугерираше дека Трамп не би победил на изборите без него, спомена дека името на Трамп се појавува во досиејата за Џефри Епстајн и повика на негово отповикување.
Според информациите објавени од Еј-Би-Си, повикувајќи се на висок функционер на администрацијата, Трамп размислува да ја подари или продаде својата црвена Тесла, што ја купил за да ја поддржи работата на Маск.
Трамп одговори дека не е сигурен дека ќе биде во добри односи со Маск во иднина, а сопственикот на Тесла потоа го обвини републиканецот дека неговото име е во досиејата на осудениот педофил Џефри Епстин.