На Куба, жителите бегаат од брегот додека се приближува „Мелиса“. Локалните власти прогласија вонредна состојба во шест провинции на истокот од земјата, а жителите се обидуваат да се снабдат со храна, свеќи и батерии
Поплавени градови, уништени домови и прекини во електричната енергија за повеќе од половина милион домаќинства остави ураганот „Мелиса“ што вчера ја погоди Јамајка.
Денеска „Мелиса“ се движи кон југоисточниот брег на Куба како бура од категорија 3, носејќи брзина на ветер до 215 километри на час.
Националниот центар за урагани вели дека „Мелиса“ сè уште е „екстремно опасен голем ураган“.
Центарот предупреди дека ураганот може да „предизвика опасни по живот и потенцијално катастрофални поплави со бројни лизгања на земјиштето“ додека се приближува кон Куба.
На Куба, жителите бегаат од брегот додека се приближува „Мелиса“. Локалните власти прогласија вонредна состојба во шест провинции на истокот од земјата, а жителите се обидуваат да се снабдат со храна, свеќи и батерии.
Низ целата земја се очекуваат исклучително силни бури, како и силни крајбрежни поплави и поројни дождови што би можеле да предизвикаат катастрофални лизгања на земјиштето. Властите ја повикаа јавноста да биде внимателна поради крокодилите, кои би можеле да претставуваат закана поради поплавите.
Кубанскиот претседател Мигел Дијаз-Канел објави дека повеќе од 735 илјади луѓе низ целата земја се евакуирани поради ураганот „Мелиса“.
„Ќе биде многу тешка ноќ за цела Куба, но ние ќе се опоравиме, со вербата во победата што Фидел и Раул ни ја всадија“,
рече тој осврнувајќи се на браќата Кастро, поранешните лидери на земјата.
„Мелиса“ веќе однесе седум жртви на Карибите, вклучувајќи три во Јамајка, три во Хаити и една во Доминиканската Република, каде што уште едно лице сè уште се води како исчезнато, пишува „Гардијан“.
Снимките објавени на социјалните мрежи покажуваат паднати далноводи, купишта остатоци и возила што лежат во каллива вода.
Jamaica 🇯🇲
— Rusty Sun Compass (@sun_iscompass) October 29, 2025
Hurricane Melissa aftermath pic.twitter.com/WcUVfhbgTR
Дезмонд Мекензи, заменик-претседател на Советот за управување со ризици од катастрофи на Јамајка вели дека „Мелиса“ има оштетено четири болници и една е без струја, принудувајќи ги службениците да евакуираат 75 пациенти.
Премиерот Ендру Холнес вели дека иако сè уште нема сигурни информации за жртвите, властите веруваат дека луѓето веројатно ги загубиле животите со оглед на обемот на уништувањето.
🌀The Black River Police Station has become a refuge for residents whose houses have been flooded. We are sticking close to the community as we weather Hurricane Melissa together.#TrackingHurricaneMelissa#AForce4Good pic.twitter.com/JPhAHJMihm
— Jamaica Constabulary Force (@JamaicaConstab) October 28, 2025
Владата на Холнес претходно го прогласи карипскиот остров за зона на катастрофа, велејќи дека „овие наредби ѝ даваат на владата алатки да продолжи да управува со нашиот одговор на ураганот“.
Ураганот од категорија 5 – најсилната класификација – стигна до Јамајка вчера, носејќи бури, ненадејни поплави и налети на ветер до 295 километри на час.
Националниот центар за урагани на САД (НХЦ) предупреди за поплави опасни по живот и потенцијални лизгања на земјиштето предизвикани од пороен дожд, деструктивни налети на ветер и бранови што достигнуваат и до четири метри во некои области. Вечерва, се очекува Мелиса да се движи кон Бахамите.