Во однос на оние 7,2 отсто „неизјаснети“ граѓани за кои не е познат етницитетот, јазикот на говорење и веросиповедта, а кои предизвикаа контроверзии во јавноста, Пендаровски посочи оти контроверзии има секогаш, а особено тука на Балканот, каде сме измешани и во религиозна и во политичка смисла
Попис со сите нишани кој не отстапува од традицијата од направени пописи што ја имавме и ние и регионот и континентална Европа, во изминатите неколку децении. Вака претседателот Стево Пендаровски го опиша најновиот попис од 2021 година, чии резултати вчера беа презентирани во јавноста.
„Самиот факт што имаме попис по цели 20 години е успех сам по себе. Не станува збор за попис најдобар во историјата на Европа, туку станува збор за попис кој ги запазува највисоките стандарди за попишување што ги има ЕУ“,
изјави денеска во Прилеп претседателот на државата Стево Пендаровски.
До оваа оценка Пендаровски дошол не само од она што го слушнал на вчерашната презентација на резултатите од пописот, туку и од коментарите дадени од експертот ангажиран од страна на Европската Унија.
Во однос на оние 7,2 отсто ‘неизјаснети’ граѓани за кои не е познат етницитетот, јазикот на говорење и веросиповедта, а кои предизвикаа конторверзии во јавноста, Пендаровски посочи оти контроверзии има секогаш, а особено тука на Балканот, каде сме измешани и во религиозна и во политичка смисла.
Тој, меѓу другото, наведе оти од она што го знае од разговорите со неколку експерти, во Европа и пошироко не постои попис кој нема одредена бројка на граѓани кои не се опфатени со пописот.
„Кај нас значаен дел, тие седум и колку проценти кои не се опфатени, за жал се резултат на бојкотот на политички субјекти. Очигледно е дека тоа имаше ефект во одредени делови од државата. Се разбира дека не треба да се исклучи како дополнителен фактор за тој процент и пандемијата“,
изјави шефот на државата Пендаровски, по обраќањето на конференција на тема „Дигитализација“, во организација на Амбасадата на Франција и Францускиот институт во Скопје.
По презентацијата на резултатите од пописот спроведен во септември лани, ВМРО-ДПМНЕ излезе со оценка оти бројките се поразителни бидејќи покажуваат дека имаме преголемо иселување, но и дека целата статистичка операција е некомплетна бидејќи 7,2 отсто односно над 130 илјади од населението не се изјасниле во однос на етничката припадност, јазикот, вероисповедта.